Hodinihina mandritra ny herinandro: Apôk. 3:14-22; Apôk. 4:9-11; Gen. 2:7; Gen. 3:8-10; Jer. 31:3,4; Jao. 15:1-11; Rom. 8:9-11.
Tsianjery: "Tahaka ny nitiavan'ny Ray Ahy no nitiavako anareo; tomoera amin'ny fitiavako hianareo." Jao. 15:9
Ahoana no hamaritanao ny fifandraisanao amin Andriamanitra amin'izao fotoana izao? Moa ve izany velona tsara sy matanjaka? Moa ve ianao manokana fotoana hanamafisana izany fifandraisana izany sy handinihana ny Teny avy amin'ny tsindrimandriny ary koa hiresahana Aminy toy ny miresaka amin'ny Sakaiza iray? Raha izany, fotoana manao ahoana no laninao amin'izany?
Moa ve tianao koa ny mizara amin'ny hafa momba ny fifandraisanao amin'Andriamanitra satria izany no fifandraisana mahafinaritra indrindra eo amin'ny fiainanao? Sa efa nihanitotongana ny fifandraisanao amin'Andriamanitra? Eny tokoa, mbola mifandray Aminy ianao indraindray, saingy raha tsorina ny marina, dia tsy mafy orina intsony izany. Mety eo antenantenany koa angamba ianao, araka izay antsoin'ny Baiboly hoe "matimaty (Apôk. 3:16).
Efa mba noeritreretinao ve raha toa ireo anjely manontany ny antony tsy iainantsika amin'ny fiderana ny Mpamonjy sy Mpanavotra antsika, amin' ny fo sy saina mangetaheta ny hanakaiky kokoa an'Andriamanitra isan'andro? Raha ny marina, dia manova ny zavatra rehetra ny fifandraisana amin'Andriamanitra, eto amin'izao fiainana izao sy any amin'ny mandrakizay.
Andeha hodinihintsika mandritra ity herinandro ity ny toetry ny fifandraisantsika amin'Andriamanitra sy ny torohevitra omen'ny Baiboly antsika. Tsy afaka ny handroso ho amin'ny tsaratsara kokoa isika raha tsy mijery ny toe-javatra amin'ny fomba mahitsy ary koa mihaino ny vahaolana atolotr'i Jesôsy .
*Famerenana ny lesona ny sabata 04 Aprily.