Vakio ny Kol. 3:6-11. Ahoana no anohizan'i Paoly ny fanazavany?
Ny teny voalohany ao amin'ny Kolosiana 3:8 dia manambara ny fiovana lehibe miainga amin'ny fahafatesana ho amin'ny fiainana: «Fa ankehitriny». Ny teny grika nadika hoe «ankehitriny» dia manantitrantitra. Ankehitriny, izany hoe, satria efa niara-natsangana tamin'i Kristy ianareo ary mikatsaka ny zavatra any ambony, dia tokony ho hafa tanteraka amin'ny fiainanao taloha ny fiainanao ankehitriny. Rehefa voavono ny «momba ny tenanareo ety an-tany» (Kol. 3:5), dia «esory koa izao rehetra izao, dia fahatezerana, fiafonafonana, lolompo, fitenenan-dratsy, teny mahamenatra avy amin'ny vavanareo.» - Kol. 3:8.
Ny fahavinirana sy ny fahatezerana dia samy afaka mamaritra ny fihetsika ara-drariny asehon'Andriamanitra manoloana ny fahotana (voaresaka omaly). toy ny fihetsik'i Jesosy koa (Mar. 3:5; Apok. 6:16). Isika kosa dia asaina «halady hihaino, ho malai-miteny, ho malain-ko tezitra; fa ny fahatezeran'ny olona dia tsy ahefana izay marina eo imason'Andriamanitra.» - Jak. 1:19,20. Maniry zava-dratsy hitranga amin'ny hafa ny lolompo. Ny fitenenan-dratsy dia natao hanalam-baraka. Melohin'i Paoly ny teny feno halozana sy mahamenatra. Farany, voarara ny mifandainga (ampitahao amin'ny Lev. 19:11,18), «fa efa narianareo ny toetra taloha mbamin'ny asany». - Kol. 3:9.
Inona no tian'i Paoly holazaina amin'ny hoe «toetra taloha» izay mifanohitra amin'ny toetra vaovao»? Jereo ny Rom. 6:6 sy ny Efes. 4:22-24.
Ny matoanteny ampiasain'i Paoly ilazana ny fialana amin'ny taloha ho amin'ny vaovao dia manondro fitafiana, toy ny hoe manaisotra ny fitafiana malotony taloha ilay olona ary mitafy fitafiana fotsy vaovao (ampitahao amin'ny Zak. 3:4). Misy fanavahana ny taloha sy ny vaovao toy izany koa hita momba ny fanekena taloha sy ny fanekena vaovao, ka ny taloha taratasin-dalana hita ivelany, ary ny vaovao kosa lalåna voasoratry ny Fanahy Masina ao am-po (2 Kor. 3:4-18).
Manoritsoritra ny fiovam-po sy ny vokany ireo fanoharana ireo, izay antsoin'i Paoly hoe «olom-baovao» (2 Kor. 5:17). «Havaozina ho amin'ny fahalalana tsara araka ny endrik'izay nahary (Kristy)» antsika isika - Kol. 3:10, izay «endrik Andriamanitra tsy hita Kol. 1:15. Manova antsika «hahazo izany endrika izany indrindra avy amin'ny voninahitra ka ho amin'ny voninahitra» ny fahalalana an'i Kristy amin'ny alalan'ny Teniny. - 2 Kor. 3:18. Mametraka antsika ho ambonin'ny fitsipika mifehy ara-poko sy ny faritra ary ny fiarahamonina rehetra izany (Kol. 3:11), satria olom-pirenena ao amin'ny fanjakana ambony kokoa isika.