MIANKOHOKA AMIN'NY SARY INDRAY
Efa ela no nahitan'ireo mpandinika ny Baiboly fa misy ifandraisany ny Dan. 3 sy izay ampianarin'ny Apôkalipsy momba ireo toe-javatra hitranga any am-parany. Ary marina izany satria ny fanamelohana ho faty ao amin'ny Dan. 3, ho an'ireo izay tsy mety miankohoka amin'ny sariolona (Dan. 3:15), dia maneho taratra ny didy manameloka ho faty ao amin'ny Apokalipsy, ho an'izay tsy mety miankohoka amin'ny sary anankiray koa. "Ary navela hanisy aina ny sarin'ny bibidia izy, mba hahateny ny sarin'ny bibidia, ary hampamono izay rehetra tsy mety miankohoka eo anoloan'ny sarin'ny bibidia." - Apôk. 13:15.
Vakio ny Apôk . 13:11-17; Apôk. 14:9,11,12; Apôk. 16:2; Apôk. 19:20; sy ny Apôk. 20:4. Inona ny fifanoherana hita eto, izay mampiavaka ny didin'Andriamanitra amin'ny didin'olombelona?
Antsoina hiankohoka amin "Izay nanao ny lanitra sy ny tany sy ny ranomasina ary ny loharano" ny vahoakan'Andriamanitra, izany hoe, ny Mpamorona, fa tsy ny bibidia sy ny sariny. Ireo zatovolahy hebreo telo izay norahonana ho faty, dia nandà tsy hanompo na inona na inona, na iza na iza, ankoatra an'Andriamanitra Mpamorona ihany. Araka izany, na samy hafa aza ny toe-javatra, dia mitovy ihany ny foto-kevitra hita teo amin'ny tany lemaka Dora izay nisy fandidiana hanompo sary fa tsy ny Mpahary, sy izay hitranga maneran-tany amin'ny fanerena ny olona hanompo sary fa tsy ny Mpahary.
Vakio ny Rom. 1:18-25. (Mariho ny fifandraisan'ny Rom. 1:18 sy ny Apok. 14:9,10 momba ny "fahatezeran'Andriamanitra.") Amin'ny fomba ahoana no ahitana fa ny fiankohofana amin'ny sary dia mampiseho fotsiny hoe iza no tian'ny olombelona hankatoavina amin'ny farany?
Tsy voatery hidika mandrakariva ho fiondrehana sy fandoroana ditin-kazo manitra ny fiankohofana, na dia mety hatao aza izany. Izay omentsika ny fankatoavantsika faratampony no iankohofantsika. Rehefa sainintsika ny momba an'Andriamanitra, Mpahary antsika, sy izay nataony ho antsika tao amin'i Jesôsy Mpanavotra antsika, dia mazava loatra fa Izy irery ihany no mendrika sy tokony hiankohofana. Fanompoan-tsampy ny zavatra hafa rehetra. Mety ho izany no anton'ilay teny henjana nataon'i Jesôsy hoe: "Izay tsy momba Ahy dia manohitra Ahy; ary izay tsy miara-mamory amiko dia manahaka" - Mat. 12:30. Izay hitranga any am-parany dia tsy inona fa fanehoana amin'ny fomba mazava io fahamarinana io.