Hoy ny mpaminany Amosa: "Tsy manao na inona na inona tokoa Jehovah Tompo, raha tsy milaza ny heviny amin'ny mpaminany mpanompony" - Amô. 3:7, ary tamin'ny alalan'i Mosesy mpaminany no nanambaran'Andriamanitra tamin'i Farao izay ho avy manaraka. Nomena fampitandremana mafy i Farao. Fitsarana marina atao amin'ny avonavona, ny fanararaotana, ny herisetra, ary ny fanompoan-tsampy izany, ary ireo rehetra ireo no nahatonga ireo loza ireo tao Egypta.
Vakio ny Eks. 11:1-10. Inona ny fampitandremana nomen'Andriamanitra talohan'ny nampiharany ny fitsarana tao Egypta?
Nomen'Andriamanitra fotoana i Egypta telo andro tao anatin'ny aizina (Eks. 10:23)-mba hisaintsainana momba izay nitranga vao tsy ela, sy ny hevitr'izany. Nomeny fampitandremana mazava farany koa izy ireo, fahafahana farany hanaovany izay tokony hatao.
Saingy voalaza ao amin'ny Eks. 11:8 fa "niala teo amin'i Farao tamin'ny fahatezerana mirehitra Mosesy." Nahoana i Mosesy no niala tamim-pahatezerana? Azo inoana fa satria fantany fa hamely olona tsy manan-tsiny maro ny loza, dia ny loza fahafolo, noho ny hamafin'ny fon'i Farao.
Ankoatra izany, ny isa folo dia manan-danja eo amin'ny tandindona ara-Baiboly. Maneho fahafenoana na fahatanterahana ny isa 10. (Saino ohatra ny Didy Folo, izay fanambarana feno ny lalana ara-pitondrantena avy amin'Andriamanitra.) Ny loza folo tany Egypta dia manondro ny fanehoan'Andriamanitra amin'ny fahafenoany ny fahamarinany sy ny famaliany.
Andriamanitra no Mpitsara, ary manohitra ny avonavona, ny tsy rariny, ny fanavakavahana, ny fireharehana, ny fanararaotana, ny halozana, ary ny fitiavan-tena Izy. Miandany amin'ireo mijaly, iharan'ny herisetra, ampijaliana ary enjehina Izy. Hampanjaka ny rariny Andriamanitra, izay endrika iray tena anehoany ny fitiavany koa. (Jereo ny Sal. 2:12, Sal. 33:5, Sal. 85:11, Sal. 89:14, Sal. 101:1, Isa. 16:5, Jer. 9:24.)
Tokony hanao ny ezaka rehetra koa isika mba ho sady be fitiavana no marina. Saingy mora amintsika ny manao tahafoatra ny amin'ny lafiny iray, ary kely loatra ny amin'ny lafiny iray. Noho ny "fitiavana", ohatra, dia manakimpy ny masontsika eo anatrehan'ny tsy mety isika, dia izay mila ahitsy. Na koa, mampanjaka ny rariny amin'ny fomba feno fangatsiahana isika, toy ny hoe mafy tahaka ny vy izany. Tsy mety ireo fomba roa tafahoatra ireo. Fa izao kosa no tsara indrindra: "(...) efa naseho anao izay tsara sy izay ilain'i Jehôvah aminao, dia izao ihany: ny hanao ny marina sy ho tia famindrampo Ary ny hanaraka an'Andriamanitrao amin'ny fanetren-tena." - Mika 6:8.
Raha tsy haintsika ny mandanjalanja tsara izany (ary tena tsy haintsika izany), nahoana no aleo manao tafahoatra amin'ny famindram-po toy izay ny rariny? Sa tsy mety koa izany?