NY FAHOTΑΝ'Ι ΑΚΑΝΑ
Vakio ny Jos. 7:16-19. Inona no ambaran ireo dingana rehetra narahina ireo momba an'Andriamanitra sy i Akana?
Tsy nambaran’ Andriamanitra mivantana ny mombamomba ilay mpandika lalàna, fa nandrafitra dingana maromaro harahina Izy, izay mampiseho ny fahamarinany sy ny fahasoavany. Rehefa avy nanazava ny antony naharesy ny Isiraely Izy, sy nanao antso mba hanamasinan'ny vahoaka ny tenany (Jos. 7:13), dia nasiany fotoana teo anelanelan'ny fanambarana ny dingana hatao sy ny fampiharana azy. izay nahafahan'i Akana nieritreritra sy nibebaka ary niaiky ny fahotany. Toy izany koa, nanana fahafahana hanapa-kevitra ny fianakaviany (raha nahafantatra izay nitranga izy ireo), na hiray tsikombakomba amin'ny fanafenana izany izy ireo na handà tsy handray anjara amin'izany, tahaka ny zanak'i Kora, izay afa-nandositra ny fandringanana rehefa nanda tsy hiandany tamin'ny rainy (ampitahao amin'ny Nom. 16:23-33, Nom. 26:11).
Ny famahana ny olana teto dia nizotra mifanohitra amin'ny fomba nidiran'izany sy nampahoriany ny Isiraely: nesorina tsikelikely, avy amin'ny Isiraely manontolo ho amin'ny firenena iray ny fahamelohana; avy eo, avy amin'ny firenena ho amin'ny foko iray; avy eo avy amin'ny foko ho amin'ny fianakaviana iray; ary avy amin'ny fianakaviana ho amin'ny isam-batan'olona. Tsy nampiseho ilay nanao heloka fotsiny izany fizotry ny fanadihadiana izany fa nahafaka ireo tsy meloka. Lafiny manan-danja amin'ny fomba fitsarana amim-pitandremana fatratra no hita eto, izay Andriamanitra mihitsy no mijoro ho vavolombelon'ny asan'i Akana tsy nisy nahita.
Toa mitaintaina koa ny mpamaky rehefa nanakaiky an'i Akana Andriamanitra. Tsy mahagaga antsika ve ny fizirizirin'io lehilahy io izay nanantena fa tsy ho tratra izy? Tsy misy takona ka tsy hitan'ny mason'i Jehovah (Sal. 139:1-16; 2 Tant. 16:9), izay mahalala ny miafina ao am-pon'ny olona (1 Sam. 16:7; Jer. 17:10: Ohab. 5:21).
Zava-dehibe ny manamarika ny fomba niantsoan'i Josoa an'i Akana: "Anaka". lo fitenenana io dia tsy ahitana taratra ny taona sy ny andraikitr'i Josoa amin'ny maha-mpitarika azy ihany, fa manambara koa ny toe-tsaina nitondran'ity lehilahy mahery ity ny fitsarana. Feno fangorahana an'i Akana ny fony, na dia nantsoina hampihatra fitsarana amin'ilay nanao heloka aza izy. Eto indray, ny fihetsik'i Josoa dia maneho mialoha ny firaisam-po, ny hatsaram-panahy ary ny fitiavan'llay "tsy mba nivatravatra fiteny mihitsy (...), na nanao teny henjana tsy amin'ny antony, na koa nampalahelo be fahatany ny fanahy mora tohina. (...) Nampangainy tsy amin-tahotra kosa ny fihatsarambelatsihy, ny tsy finoana, sy ny fanaovan-dratsy, nefa tamin-dranomaso no nitenenany raha nanao ireo faniniana nandratra fo Izy." - IFM, t. 371.
Raha tsapanao fa mahalala izay rehetra ataonao Andriamanitra, na dia Izay afeninao aza; inona no fiantraikan'izany eo amin'ny fomba fiainanao? Inona no tokony ho akon'izany eo amin'ny fomba fiainanao?