Ny fomba voalohany nampiasain'Andriamanitra hampitana ny hafany tamin'ny olombelona dia tamin'ny alalan'ny fifandraisana mivantana am-bava, toy ny feo re mazava, na nofy, na anjely. Tamin'ny andron'i Mosesy vao hita tao amin'ny Soratra Masina ny toromarika voalohany avy amin'Andriamanitra, izany hoe nosoratana tao anaty "boky" izay nolazain'Andriamanitra.
Inona no noresahina voalohany indrindra ao amin'ny Baiboly momba ny fanoratana? Vakio ny Eks. 17:14.
Ahitana ohatra maro ao amin'ny TT momba ny nanomezan'Andriamanitra toromarika ireo mpitondra ny hafany, mba hitahiry an-tsoratra ny Teniny ho an'ny vahoakany. Toa an'i Mosesy, dia nilazana toy izao koa i Jeremia:
"Makà horonan-taratasy hianao, ka soraty amin'izany ny teny rehetra izay nolazaiko taminao ny amin'ny Isiraely sy ny Joda ary ny firenena rehetra hatramin'ny andro nilazako taminao, dia hatramin'ny andron'i Josia ka mandraka androany." - Jer. 36:2.
Nomena azy koa ny antony tokony hanoratany ireo faminaniana ireo: "Angamba hoheverin'ny taranak'i Joda ny loza rehetra izay kasaiko hatao aminy, dia samy hiala amin'ny làlany ratsy avy izy, ka havelako ny helony sy ny fahotany." - Jer. 36:3. Nomena ireo faminaniana ireo mba hitondra ny olona ho amin'ny famonjena, fa tsy hanomezana fahafaham-po fotsiny ny fahalianana te hahafanta-javatra momba ny hoavy.
Nanoratra tao anatin'ny toe-javatra isan-karazany ireo mpitondra ny hafatr'Andriamanitra. Tany an'efitra no nanoratan'i Mosesy ireo boky dimy voalohany ao amin'ny Baiboly. Maro amin'ireo Salamo nataon'i Davida no nosoratany raha teo am-panenjehana azy i Saoly (jereo ny Sal. 52, 54, 57, 59). I Daniela dia nanoratra ny fahitany raha mbola nanompo tao an-dapan'i Babylona sy ny lapan'i Media sy Persia izy. I Paoly kosa nanoratra ny epistiliny ho an'ny Efesianina, ny Filipianina, ny Kolosianina ary ny Filemona raha mbola tany am-ponja. Ary i Jaona dia nanoratra ny bokin'ny Apokalypsy tany Patmo, raha natao sesitany izy.
Mazava fa rehefa nantsoin'Andriamanitra hanoratra ireo mpitondra hafatr'Andriamanitra, dia nomen'ny Fanahy Masina hery sy notarihiny izy ireo, na inona na inona toe-javatra nisy azy.
Mahaliana fa ny fampianaran'i Jesosy rehetra dia voatahiry ho antsika amin'ny endrika voasoratra, tamin'ny alalan'ireo olona nofidin'Andriamanitra hitahiry ireo fahamarinana sarobidy ireo. Mampiseho izany fa nitokian'Andriamanitra ny fandraketana an-tsoratra amim-pahatokiana sy ny fitehirizan'ireo olona nirahiny ny hafatra avy Aminy.
Ahoana no hamalianao ny olona izay milaza fa tsy azontsika itokiana ny Baiboly satria tsy ananantsika intsony ny sora-tanana tany am-boalohany? Nahoana no tsy maharesy lahatra izany hevitra izany raha ny marina?