"Tsy anankiray amin'ireo fanomezam-pahasoavana marobe ny fitiavana fa fitaovana hahafahan'ireo fanomezam-pahasoavana rehetra manatratra ny tanjony fara tampony.". Carl P. Cosaert, "1 Corinthians," Andrews Bible Commentary: New Testament (Berrien Springs, MI: Andrews University Press, 2022), t. 1643.
Vakio ny 1 Kor. 13:1-7 sy ny 1 Pet. 4:8-11. Inona ny anjara asan'ny fitiavana raha toa ka fanomezam-pahasoavana no resahina?
Ampianarin'ny 1 Kor. 13 antsika fa amin'ny alalan'ny fitiavana ihany no ahafahana mampiasa ny fanomezam-pahasoavana araka ny tokony ho izy. Ny fanombohan'i Paoly ny 1 Kor. 13 amin'ny firesahana momba ireo fanomezam-pahasoavana tanisain'ny 1 Kor. 12 dia nataony mba hanipihana fa tsy misy lanjany ireo fanomezam-pahasoavana ireo raha tsy vokatry ny fitiavana. Araka izany, ny fahalalana (1 Kor. 12:8) sy ny finoana (1 Kor. 12:9), eny fa ny finoana izay "mahafindra tendrombohitra" aza (1 Kor. 13:2), dia tsinontsinona raha tsy eo ny fitiavana (1 Kor. 13:2). Raha tsy misy fitiavana, dia tonga "varahina maneno sy kipantsona mikarantsana" fotsiny ny fitenenana amin'ny fiteny samy hafa tsy fantatra (1 Kor. 13:1; 1 Kor. 12:10, 28, 30). Toy izany koa, na dia ny fanomezam-pahasoavan'ny faminaniana aza, izay manan-danja tokoa, dia tsinontsinona raha tsy eo ny fitiavana (1 Kor. 13:2).
Mifantoka amin'izay atao hoe fitiavana sy izay tsy atao hoe fitiavana i Paoly ao amin'ny 1 Kor. 13:4-7; ifantohany manokana kokoa izay asa ataon'ny fitiavana sy izay tsy ataony. Ny matoanteny nosafidiny hanoritsoritana ny fitiavana dia maneho fa tsy izay tsapan'ny olona fotsiny no atao hoe fitiavana fa izay ataony sy ampihariny indrindra indrindra. Noho izany, dia ambarany fa ny fitiavana dia (1) mahari-po; (2) mora fanahy; (3) mifaly amin'ny fahamarinana; (4) mandefitra ny zavatra rehetra; (5) mino ny zavatra rehetra; (6) manantena ny zavatra rehetra; (7) maharitra ny zavatra rehetra. Etsy ankilan'izany, ny fitiavana dia (1) tsy mialona; (2) tsy mirehareha; (3) tsy mieboebo; (4) tsy manao izay tsy mahamendrika; (5) tsy mitady ny azy; (6) tsy mora sosotra; (7) tsy manao otripo; ary (8) tsy mifaly amin'ny tsi-fahamarinana.
Ireo matoanteny 15 ireo no manome tari-dalana mazava momba ny fitondrantena tokony hananana eo amin'ny fampiasana ny fanomezam-pahasoavana. Tsara homarihina fa io fampianarana momba ny tena toetry ny fitiavana io dia hita eo anelanelan'ny 1 Kor. 12 sy 14, izay iresahan'i Paoly momba ny olana sy ny fifandirana mahakasika ny fanomezam-pahasoavana. Eny tokoa, ny fitiavana no tsiambaratelon'ny fampiasana amim-pahendrena ny fanomezam-pahasoavana. Mifanindran-dalana amin'ny finoana sy ny fanantenana koa ny fitiavana, "fa ny fitiavana no lehibe amin'ireo."- 1 Kor. 13:13.
Nahoana ny fitiavana no ivon'ny finoantsika? Inona moa ny fomba tsara kokoa hananana fanandramana momba ny maha zava-misy marina ny fitiavan'Andriamanitra raha tsy amin'ny fikatsahana amim-bavaka ny haneho izany fitiavana izany amin'ny hafa?