Ny fanomezampahasoavan’ny fitenenana amin’ny fiteny samihafa.
Ahoana kosa ny amin'ny fanomezam-pahasoavan'ny fitenena amin'ny fiteny samihafa? Araka ny fanehoana io fanomezam-pahasoavana io any amin'ny toeran-kafa ao amin'ny Baiboly (Mar. 16:17; Asa. 2:1-13; Asa. 10:44-48; Asa. 19:6), ny fanomezam-pahasoavan'ny fitenenana amin'ny fiteny samihafa ao amin'ny 1 Kor. dia azo heverina fa fahaiza-manao omen'ny Fanahy Masina ahafahana miteny vahiny.
Tanisain'i Paoly ao anatin'ireo fanomezam-pahasoavana ao amin'ny 1 Kor. 12:8-10 ny fitenenana amin'ny fiteny samihafa (jereo koa ny 1 Kor. 12:28, 30; 1 Kor. 13:1, 8). Na izany aza, dia resahiny matetika kokoa izany ao amin'ny 1 Kor. 14. Mihoatra ny in-20 no amerimberenany ny teny grika hoe glōssa ("lela" na "fiteny") ao amin'ny 1 Kor. 12-14, ary in-15 no ahitana izany ao amin'ny 1 Kor. 14. Ankoatra izany, ny teny grika heteroglossos ("fiteny hafa") dia hita koa ao amin'ny 1 Kor. 14:21. Izany famerimberenana momba ny fanomezam-pahasoavan'ny fitenenana amin'ny fiteny samihafa izany dia maneho fa manan-danja manokana ho an'i Paoly io lohahevitra io. Ny fampiasan'ny fiangonana tany Korinto io fanomezam-pahasoavana io, fampiasana izay tsy araka ny tokony ho izy sy ny fanararaotana izany, no niteraka fikorontanana sy fisafotofotoana nandritra ny fanompoam-pivavahana nahavory ny rehetra (1 Kor. 14:23, 27, 33, 40).
Vakio ny 1 Kor. 14:5, 13, 26, 24 sy ny 1 Kor. 12:10, 30. Inona ny torolalana manokana nomen'i Paoly mahakasika ny fanomezam-pahasoavan'ny fitenenana amin'ny fiteny samihafa?
Tokony hiara-dalana amin'ny fandikan-teny ny fanomezam-pahasoavan'ny fitenenana amin'ny fiteny samihafa mba hahatakaran'ny mpihaino izay lazaina (1 Kor. 14:9), raha tsy izany dia tsy mahasoa na inona na inona ny fampiasana izany fanomezam-pahasoavana izany (1 Kor. 14:6). Izany no antony anasongadinan'i Paoly fatratra ny fandikan-teny sy ny fahatakarana. Mazava loatra fa tsy ny fanomezam-pahasoavan'ny fiteny tsy fantatra no tsinian'i Paoly, fa ny fanindrahindran'ireo Korintianina io fanomezam-pahasoavana io, izay nitarika azy ireo hanao tsinontsinona ny fanomezam-pahasoavan'ny faminaniana (ho hitantsika rahampitso ny amin'izany).
Araka izany, zava-dehibe ny manamarika fa na dia tian'i Paoly aza ny hahaizan'ireo Korintianina rehetra miteny amin'ny fiteny vahiny (1 Kor. 14:5), dia tsy izany no niriny ho tanteraka (1 Kor. 12:10). Araka izany, "fandikana vilana ny fampianaran'i Paoly ao amin'ny 1 Kor. 12 sy 14 ny fieritreretana fa ny olona rehetra no tokony hiteny amin'ny fiteny tsy fantatra mialoha ny hangatahana ny batisan'ny Fanahy Masina."- Raoul Dederen, Handbook of Seventh-day Adventist Theology, electronic ed., vol. 12 of Commentary Reference Series (Hagerstown, MD: Review and Herald Publishing Association, 2001), t. 620.
Misy olona mahay tenim-pirenena hafa ve ao am-piangonanao? Ahoana no ahafahan'izy ireo mampiasa izany talenta izany hanatrarana ny hafa ho an'i Kristy? Ahoana no anampian'izany antsika hahatakatra ny tena toetry ny fiteny samihafa resahin'i Paoly?