Hodinihina mandritra ny herinandro: Fil. 3:17-4:23; 1 Kor. 15:42-44; Jao. 14:27; Sal. 119:165; Jôba 1:21; 1 Tim. 6:7.
Tsianjery:
"Aza manahy na inona na inona; fa aoka ny fivavahana sy ny fifonana mbamin'ny fisaorana no ho entinareo manambara ny fangatahanareo amin’Andriamanitra amin'ny zavatra rehetra."-Fil. 4:6.
Ny lesontsika amin'ity herinandro ity no mamarana ny fandinihantsika ny epistily ho an'ny Filipiana, ary misy lesona sarobidy sy filamatra ho antsika eo amin'ny fiainana andavanandro izany. Toa hita ao amin'ireo andininy mamarana io epistily io ny ankamaroan'ireo soatoavina ambony-ara-pitondrantena izay nifehy ny fiainan'ny apôstôly Paoly. Tahaka ny fampianaran'i Jesôsy , izay mifantoka amin'ny toetra anaty, dia ny tsiambaratelon'ny fiainana kristianina feno fifaliana no zarain'i Paoly amintsika.
Na rehefa tsy mandeha araka izay antenaintsika aza ny toe-javatra, izay mateti-pitranga kokoa, tsy araka izay anampoizantsika azy, dia tsy mila manahy na mitebiteby na kivy isika. Misy foto-kevitra izay hanampy antsika hahazo hery hiatrehana ny ady sarotry ny fiainana, ary amin'izany no hahatsapantsika fiadanana lalina sy maharitra, izay Andriamanitra irery ihany no afaka manome azy. Izy no mifehy ny ankehitriny sy ny ho avy, ary hanome izay rehetra ilaintsika.
Ity no zava-dehibe indrindra: tsy tokony hametraka ny fanantenantsika amin'ny rafi-pitondrana eto an-tany isika, izay mandiso fanantenana mandrakariva. Olom-pirenen'ny fanjakan'Andriamanitra isika amin'ny maha Kristianina antsika, ary omena antsika ireo tombontsoa lehibe miaraka amin'izany. Misy andraikitra koa anefa tsy misaraka amin'izany.
*Famerenana ny lesona ny sabata 14 Febroary.