Vakio ny "Amintsika Andriamanitra", toko voalohany ao amin'ny IFM.
"Ny drafitry ny fanavotana antsika dia tsy noheverina taty aoriana, na nalamina taorian'ny nahalavoan'i Adama. Fanambarana ny zava-miafina, izay hatry ny fony fahagola, izany (Rôm. 16:25). Famelabelarana ireo foto-kevitra izay niorenan'ny seza fiandrianan’Andriamanitra hatry ny fahagola izany. Hatramin'ny voalohany dia fantatr’Andriamanitra sy Kristy ny fivadihan'i Satana, sy ny fahalavoan'ny olona noho ny hery mamitak’ilay mpihemotra. Tsy nibaiko ny hisian'ny fahotana tsy akory Andriamanitra, fa tazany mialoha ny fisiany, ka nomaniny izay ilaina hoenti-misetra io zava-doza mahatsiravina io. Lehibe indrindra ny fitiavany an'izao tontolo izao, ka nanao fanekena Izy hanome ny Zanani-lahy tokana "mba tsy ho very izay rehetra mino Azy fa hanana fiainana mandrakizay." IFM, 1. 12, ed. 1983.
FANONTANIANA hifanakalozan-kevitra
1. Raha tsy azon'Andriamanitra mandrakariva izay iriny, ahoana no fiantraikan'izany eo amin'ny fihevitrao mahakasika ny zava-miseho eto amin'ity tontolo ity? Inona no fiantraikan'ny fahatakarana fa tsy tanteraka ny fanirian Andriamanitra?
2. Raha iverenantsika ny fanoharana momba ny mofomamy tamin'ny Alakamisy, dia ho takatsika fa na dia "fantatr'Andriamanitra sy Kristy" aza "ny fivadihan'i Satana", dia niroso tamin'ny famoronana antsika hatrany Izy ireo. Azo antoka fa noho ny fitiavana izany, ary ny fitiavana dia midika ho fahalalahana. Noforonin'Andriamanitra mba hahay mitia isika mba hitiavantsika; nataony izany na dia fantany aza fa hitarika ho amin'ny fanomboana an'i Jesôsy eo amin'ny hazo fijaliana amin'ny farany. Inona no tokony hambaran'izany momba izao: masina ny fitiavana ary koa fototra iorenan'ny fitondram- panjakan’Andriamanitra ka tsy nolavin'i Kristy ny hanome antsika ny fahalalahana mifandraika amin'izany fa naleony niaritra ny fahoriana teo amin'ny hazo fijaliana?
3. Matetika isika no mitomany noho ny faharatsiana sy ny fahoriana misy eto amin'ity tany ity, nefa impiry moa isika no manokana fotoana hisaintsainana fa Andriamanitra koa dia mitomany sy ory noho ny fahoriana sy ny faharatsiana? Inona ny fiovana eo amin'ny fahatakaranao momba ny faharatsiana sy ny fahoriana nony tsapanao fa mampahory an'Andriamanitra koa ny fisian'ny faharatsiana?
4. Zavatra maro no mitranga eto an-tany nefa tsy sitrapon'Andriamanitra; ahoana no anampian'izany fahamarinana izany anao hiatrika ny fahorianao manokana, indrindra raha tsy takatrao ny anton'izany ary koa hitanao fa toa tsy mitondra soa mihitsy izany?