Vakio ny Jao. 20:11-13. Inona no mitranga eto izay maneho ny antony tsy nahatakaran'i Maria ny hevitr'llay fasana foana?
Ao amin'ny Jao. 20:2 no niresahana farany momba an'i María, izay nihazakazaka nitantara tamin'i Petera sy i Jaona ny amin'ilay fasana foana. Nihazakazaka tany amin'ny fasana izy roa lahy, ary fotoana elaela taorian'izy ireo dia niverina tany amin'ny fasana i Maria. Niala teo amin'ny fasana i Petera sy i Jaona rehefa nandinika tsara ny zava-nisy. I Maria kosa rehefa niverina dia nijanona teo nitomany. Inoana fa be tokoa izay ranomaso narotsak'i Maria izay tao anatin'ny andro vitsivitsy lasa. Nanampy trotraka ity toe-javatra ity. Niondrika nitsirika tao amin'ny fasana izy.
Taitra izy nahita anjely roa nitafy lamba fotsy nipetraka teo amin'ilay nandrian'ny fatin'i Jesôsy. Dia nanontany an'i Maria ireo hoe: "Ravehivavy, nahoana hianao no mitomany?". Tamin'alahelo no namaliany azy hoe: "nalain'olona ny Tompoko, ka tsy fantatro izay nametrahany Azy."
Vakio ny Jao. 20:14-18. Inona no nampiova ny zavatra rehetra ho an'i Maria?
Nitodika i Maria, ny masony vonton-dranomaso, ary nahita olona nijoro avy teo aoriany izy. Nanao teny mitovy amin'ny an'ireo anjely ity Olon-tsy fantatra ity, nanao hoe: "Ravehivavy, nahoana hianao no mitomany? Iza no tadiavinao?" Jao. 20:15. Noheveriny fa mpiandry saha no niresahany ka nangataka ny fanampiany izy hitady ny fatin'i Jesôsy.
Izao fotsiny no nolazain'llay Olon-tsy fantatra: "Ry Maria!". Fanambarana fohy nanova izao tontolo izao izany. Taitra i Maria; tampoka teo dia fantany fa i Jesôsy nitsangana tamin'ny maty no niresaka taminy. Ninia niteny tamin'i Maria i Jesôsy mba tsy hihazona Azy satria tsy maintsy hiakatra ho any amin'ny Rainy aloha Izy. Fa ny anjarany kosa dia ny mandeha manambara amin'ny mpianatra ny tenin'i Jesôsy hoe: "Miakatra ho any amin'ny Raiko sy ny Rainareo Aho, ary ho any amin'Andriamanitro sy Andriamanitrareo." - Jao. 20:17. Notanterahin'i Maria ny asa nanirahana azy. Nambarany tamin'ny mpianatra fa nahita ny Tompo izy. ary notantarainy koa ny tsipiriany rehetra tamin'ny resaka nifanaovany tamin'i Jesôsy (Jao. 20:18).
Vakio ny 1 Kôr. 15:12-20. Araka ny hevitr'i Paoly, inona no ilantsika ny finoana amin'ny maha-Kristianina antsika raha tsy natsangana tamin'ny maty i Kristy?