"Kanefa tsy mahalala ny ho ampitso hianareo. Inona moa ny ainareo? Fa zavona ihany hianareo, izay miseho vetivety, dia levona." - Jak. 4:14.
Mofon’aina:
Tsy misy fivavahana ao amin'ny fanindrahindrana ny "izaho". Takin'Andriamanitra ny hahamarina antsika eo anatrehany, ny hampiasana ireo talenta nomeny antsika mba hahazoantsika talenta hafa. Ny sitrapony no tokony ho sitrapontsika amin'ny zavatra rehetra. Mampitotongana ny toetsika ara-môraly ny fialana amin'ny fenitra napetrany. Mety hahatonga antsika hisandratra izany, mety hampanan-karena antsika ary hahatonga antsika hiara-mipetraka amin' ireo andriana, kanefa eo imason'Andriamanitra dia tsy madio isika no sady tsy masina. Efa natakalontsika tombontsoa feno fitiavan-tena ny fizokiantsika ka izao no voasoratra momba antsika any an-danitra: "nolanjaina tamin'ny mizanan'ny fitoerana masina ka hita fa latsa-danja"
Raha raisintsika ho fanomezan' Andriamanitra kosa ny talentantsika ary ampiasaintsika amin'ny fanompoana Azy amin'ny alalan'ny fangorahana sy ny fitiavana ireo namantsika, dia tonga fantsona hikorianan'ny fitahian'i Jehôvah amin'izao tontolo izao isika; ary rehefa ho avy ny andro lehibe amin'ny farany dia harahabaina amin'izao teny izao isika: "Tsara izany, ry mpanompo tsara sady mahatoky; nahatoky tamin'ny kely hianao, dia hotendreko ho mpanapaka ny be; midira amin 'ny fifalian'ny tomponao." - Mat. 25:21.
Mihazakazaka any amin'ny mandrakizay ny fotoana, izay feno toe-javatra fanararaotra sarobidy toy ny volamena mba hanompoana ny Tompo. (...) Moa ve hararaotinao ireny fotoana ireny raha mandalo? Tsy azonao atao ny manao tsinontsinona izany, satria tsy maintsy hijoro hotsaraina eo anoloan'ny seza fiandrianan'Andriamanitra ianao (...). Moa ve ny teninao mampahery ireo izay manatona anao mba hitady fanampiana sy fampaherezana? Moa ve ny hery miasa mangina avy aminao mampahatanjaka ireo izay mifandray aminao? Moa ve ny fanananao atolotrao amim-pahatokiana ho an'ny Tompo?
Atokany ho amin'ny fanompoana ny Tompo ny tenanao anio. (...) Apetraho eo amin'ny Tompo ny ahiahinao, ary aza avela hampisaraka anao Aminy ny zavatr'ity tany ity. Atokany ho Azy ny momba anao sy izay anananao rehetra, fa "fanompoana mety" ataonao izany. Aza miandriandry, satria misy loza ao anatin'ny fotoan'ny fitaredretra (...). - Lio. 16:2b. - ST, 21 Janoary 1897.