Vakio ny Sal. 37:1,8; Sal. 49:5-7; Sal. 94:3-7 ary ny Sal. 125:3. Inona ny tolona atrehin'ny mpanao Salamo eto?
Mitaraina noho ny fiadanan'ny ratsy fanahy sy ny fihaikana aterak'izany ho an'ny marina ireo Salamo ireo. Tsy hoe mahomby fotsiny ny ratsy fanahy, fa manao tsinontsinona an'Andriamanitra amin'ny fomba miharihary no sady mampahory ny hafa. Izao no toe-javatra maha very hevitra: raha manapaka ny tany ny "tehim-panjakan'ny ratsy fanahy" - Sal. 125:3, dia toy ny tsy mahomby kosa ny "tehim-pahamarinana" - Sal. 45:6. Raha izany, nahoana moa raha miala an-daharana ka miandany amin'ny ratsy tahaka izay ataon'ny hafa?
Vakio ny Sal. 73:1-20, 27. Inona no manampy ilay mpanao Salamo hamakivaky ny toe-java-tsarotra? Toy ny ahoana ny fiafaran'ireo izay mitoky amin'ny zava-poana? (Jereo koa ny 1 Pet. 1:17).
Raha mbola nifantoka tamin'ny fandikan-dalàna misy eto amin'izao tontolo izao ny mpanao Salamo ao amin'ny Sal. 73 dia tsy hitany ny tena zava-misy araka ny fijerin'Andriamanitra. Lehibe loatra ny olana nateraky ny fahombiazan'ny ratsy fanahy tamin'ny finoany, ary ninoany koa fa niorina tamin'ny zava-misy ny fanambarany mikasika ny tsy ilana ny finoana.
Asehon'ny Sal. 73 anefa fa "izany zavatra izany dia manahiran-tsaina ireo tsy mihevitra ny andininy voalohany amin'ity Salamo ity, izay famintinana ilay Salamo manontolo hoe: 'Endrey ny fahatsaran'Andriamanitry ny Isiraely amin'izay mahitsy fo!"- Johannes Bugenhagen, Reformation Commentary on Scripture (Downers Grove, IL: InterVarsity Press, 2018), t. 11.
Nosarihina ho amin'ny fitoerana masina izay toeran'ny fanapahan' Andriamanitra - ny sain'ilay mpanao Salamo, ary nampahatsiahivina azy tao fa ampahany kely iray amin'ny sary lehibe fotsiny ny "ankehitriny" ary tokony hihevitra ny amin'ny "farany" izy, dia ny fotoana izay hiatrehan'ny ratsy fanahy ny fitsaran'Andriamanitra. Ny fahatakaran'ilay mpanao Salamo izany fahamarinana izany tao amin'ny fitoerana masina sy ny fiaikeny ny fahadalany teo aloha dia maneho fa ny fomba fijery ara-panahy ihany no ahafahana mahatakatra ny zava-misy fa tsy ny fisainan'olombelona.
Ahoana no ampaherezan'ny teny fikasana momba ny hitsaran' Andriamanitra an'izao tontolo izao sy ny faharatsiana rehetra eo aminy anao eo anatrehan'ny faharatsiana marobe izay tsy faizina amin'izao fotoana izao?