Vakio ny Sal. 41:1-4; Sal. 88:3-12 ary ny Sal. 102:3-5, 11, 23, 24. Inona ny fanandramana resahin'ireo andalan-teny ireo? Efa nahatsapa toy izany koa ve ianao?
Asehon'ireo vavaka fangatahana fanafahana amin'ny aretina sy ny fahafatesana ireo fa tsy afa-miala amin'ny fahoriana eto amin'izao tontolo izao ny zanak'Andriamanitra. Maneho ny fahorian-dehiben'ny mpanao Salamo ireo Salamo ireo. Tsy manan-kery izy, malazo tahaka ny ahitra, tsy mahinan- kanina, nafoy ho any amin'ny maty, tahaka izay voavono mandry ao am-pasana, nampanalavirina ny sakaizany, ory sy mijaly. Miraikitra amin'ny hodiny ny taolany.
Salamo maro no maneho ny hevitra fa navelan'Andriamanitra hiseho ny fahoriana noho ny tsy fankatoavan'ny Isiraely. Manaiky ny mpanao Salamo fa mety mitondra aretina ho an'ny olona ny fahotana; noho izany no iresahany ny amin'ny famelan-keloka izay mialoha ny fahasitranana (Sal. 41:3,4). Na izany aza, ny Salamo sasany, toy ny Sal. 88 sy ny Sal. 102, dia miaiky fa toe-javatra mpiseho eo amin'ny fiainana ny fahorian'ny vahoakan'Andriamanitra, na dia saro-takarina tokoa aza izany.
Andriamanitra no ambaran'ny Sal. 88 fa mitondra ilay mpanao Salamo ho eo ambavahoana (Sal. 88:6-8). Mariho anefa fa na dia fitarainana feno fahasahiana indrindra aza no soratana eto, dia miharihary fa maneho finoana izany fitomaniana izany, fa raha avelan'Andriamanitra ao amin'ny fiandrianany hiseho izany fahoriana izany dia azony atao ny mamerina amin'ny laoniny indray ny fiadanan'ny zanany.
Raha eo ambavahoana ilay mpanao Salamo dia tsaroany ireo fahagagana nataon'Andriamanitra sy ny fahalemem-panahiny feno fitiavana, ny fahatokiany ary ny fahamarinany (Sal. 88:10-12). Na dia mahatsapa ho voakapok'Andriamanitra aza ilay mpanao Salamo, dia mbola mifahatra Aminy ihany. Na dia ory aza izy dia tsy mandà ny fitiavan'Andriamanitra, ary fantany fa Andriamanitra no hany famonjena ho azy. Asehon'ireo antso ataony fa tsy ny fahoriana ihany no fantatr'ilay mpanao Salamo, fa fantany tsara koa ny fahasoavan'Andriamanitra, ary tsy voatery hifanipaka mandrakariva ireo roa ireo.
Raha fintinina, ny famelan'Andriamanitra ny fahoriana hiseho sy ny fanafahany dia fanehoana ny fiandrianany lehibe. Mitondra fanantenana ny fahafantarana fa mifehy ny toe-javatra Izy. Rehefa mamaky ny Sal. 88 eo am-pisaintsainana ny fahorian'i Kristy isika, dia talanjona ny amin'ny halalin'ny fitiavany izay nanekeny hiditra ny varavaran'ny fahafatesana ho an'ny taranak'olombelona.
Eritrereto ny amin'i Jesôsy eo amin'ny hazo fijaliana sy ny niaretany fahoriana noho ny fahotana. Niaritra ny fahoriana mafy indrindra noho izay niaretantsika Andriamanitra tao amin'i Kristy, ahoana no anampian'izany antsika hihazona ny finoana na dia ao anatin'ny fotoam-pahoriana sy fitsapana aza?