Midira eo amin'ny vavahadiny amin'ny fisaorana, ary eo an-kianjany amin'ny fiderana; misaora Azy, mankalazà ny anarany." - Sal. 100:4.
Raha manokana ny fontsika sy ny saintsika ho amin'ny fanompoanaan' Andriamanitra isika, ka manao ny asa asainy ataontsika, ary mandeha araka izay nandehanan'i Jesôsy koa, dia hanjary lokanga masina ny fontsika, ka ny tadiny tsirairay dia hamoaka feo fiderana sy fisaorana an'Ilay Zanak'ondrin' Andriamanitra manaisotra ny fahotan'izao tontolo izao (...).
Tian'i Kristy hifantoka Aminy ny fisainantsika (...). Aza mijery ny "izaho" fa mitodiha any amin'i Jesôsy, Ilay loharanon'ny fitahiana rehetra sy ny fahasoavana rehetra, Ilay loharanon'ny zava-tsoa sy sarobidy rehetra ho an'ny zanak' Andriamanitra. (...)
I Jesôsy Tompo no hery sy fahasambarantsika, Ilay trano firaketana lehibe azon'ny olona anovozana hery amin'ny fotoana rehetra. Rehefa mandinika ny momba Azy isika, rehefa miresaka ny Aminy, ka afaka mibanjina Azy bebe kokoa - rehefa mitaky ny fahasoavany isika ka mandray ny fitahiana atolony, dia manan-javatra azontsika anampiana ny hafa. Amin'ny fo feno fankasitrahaa no ampitantsika amin'ny hafa ny fitahiana izay efa nomena antsika maimaimpoana. Rehefa mandray sy manome toy izany isika dia mitombo amin'ny fahasoavana; ary mipololotra fiderana sy fisaorana tsy mitsahatra ny vavantsika; mahavelom- pankasitrahana ny fontsika ny toetran'i Jesôsy malemy fanahy, ary misandratra sy mahatsapa fiarovana ny fanahintsika. Manjary fahamarinantsika, amin'ny alalan'ny finoana, ny fahamarinan'i Kristy tonga lafatra sy mandrakizay.
Aoka ny fitahiana havaoziny ho antsika isan'andro hamoha fiderana ao am-pontsika, fa fanehoana ny fiahiany antsika amim-pitiavana izany.
Isa-maraina, raha vao misokatra ny masonao, dia misaora an' Andriamanitra noho ny niarovany anao nandritra ny alina. Isaory Izy noho ny fiadanany ataony ao am-ponao. Aoka ny fankasitrahanao Azy maraina, atoandro, ary hariva, ho toy ny fofo-manitra miakatra ho any an-danitra. (...)
Miambina antsika tsy ho azon'ny ratsy, ary manohitra ny herin'ny maizina mitady handringana antsika (...) ireo anjelin' Andriamanitra alin- kisa. Moa ve tsy manana antony maro tokony hisaorana an'Andriamanitra isika amin'ny fotoana rehetra, eny, na dia toa misy zava-tsarotra aza ny lalantsika? - MLT, t. 171.