"Fa na iza na iza no misotro ny rano izay homeko azy dia tsy hangetaheta mandrakizay: fa ny rano izay homeko azy dia ho loharano miboiboika ao anatiny ho fiainana mandrakizay." - Jao. 4:14.
Fony i Kristy niresaka tamin'ilay vehivavy Samaritanina, dia tsy niady hevitra momba ny fantsakan'i Jakóba Izy, fa nampiseho zavatra tsara lavitra (...). Notarihiny ny resaka ho amin'ilay harena sarobidy tokony homeny azy, ka zavatra tsara lavitra noho izay nananan'ilay vehivavy no natolony azy, dia ranovelona, ny fifaliana sy ny fanantenana avy amin'ny filazantsara.
Lehibe manao ahoana ny fitsinjovan'i Kristy ity vehivahy tokana ity! Akory ny fahitsiana sy ny hazavan'ny Teniny! Rehefa nandre izany ravehivavy dia nandao ny sininy ka lasa nankany an-tanána, nilaza tamin'ireo izay tojo azy hoe: "Andeha hizaha izaroa Lehilahy izaroana, Izay nilaza tamiko ny nataoko rehetra; Izao angaha no Kristy?" Voalaza fa "maro ny Samaritana avy tao amin'izany tanána izany no nino an'i Jesosy -and. 29,39. Ary iza, hatramin'izay taona maro lasa izay ka mandraka ankehitriny, no mahay manombana ny hery mahavonjy avy amin'izany teny izany?
Tonga nifandray manokana tamin'ny olona i Jesosy. Tsy nihataka tamin'ireo izay nila vonjy Taminy Izy. Niditra tany an-tranon'izy ireo Izy, nampahery ny ory, nanasitrana ny marary, nanaitra ireo tsy miraika, ary nandehandeha nanao soa. Raha mpanara-dia an'i Jesosy isika dia tsy maintsy manao tahaka izay nataony koa, tsy maintsy manampy ny olona tahaka ny nanampiany azy ireo koa. Irin'ny Tompo ny hahafantaran'ny fanahy tsirairay ny tenim-pahasoavany. Asa ataon'ny tena manokana no tsy maintsy anatanterahana izany amin'ny ampahany lehibe. Toy izany ny fomba fiasan'i Kristy. Fifandraisana amin'ny isam-batan'olona no tena nameno ny asan'i Kristy. Na fanahy tokana aza no nihaino Azy dia nanan-danja Taminy manokana izany. Matetika tamin'ny alalan'izany fanahy tokana izany no nielezan'ny hafatra tamin'ny olona an'arivony (...). Marobe ireo izay tsy ho tratry ny filazantsara na oviana na oviana raha tsy entina ho eo aminy izany. MLT, t. 227.