"Aza matahotra hianao, fa momba anao Aho; ary aza miherikerika foana, fa Izaho no Andriamanitrao; mampahery anao Aho sady mamonjy anao; eny, mitantana anao amin'ny tànana ankavanan’ny fahamarinako Aho." — Isa. 41:10.
Mofon’aina:
Tokony hikaroka fomba sy fahafaha-manao izay hahatonga ny zanany hanan-javatra hatao mandrakariva ny ray aman-dreny (...). Tsy tokony hohadinoin'ny ray aman-dreny na oviana na oviana fa mila miasa mafy ho an'ny tenany sy ho an'ny zanany izy raha tiany ny ho voaro miaraka aminy. Mbola eto amin'ny tanin'ny fahavalo isika. Aoka ny ray aman-dreny hitolona mafy mba hahatratra ny fenitra ambonimbony kokoa ka hitondra ny zanany miaraka aminy. (...)
Manehoa fahavononana hanao ny ezaka rehetra azonao atao mba hametrahana ny zanakao eo amin'ny toe-javatra mety indrindra ho an'ny fanefena ny toetra izay takin'Andriamanitra amin' ny mpanompony. (...) Hioko amin'ny famotehana anareo ny herin'ny helo. Mivavaha matetika kokoa noho izay fanaonao. Ampianaro amim-pitiavana sy amim-pahalemem-panahy ny zanakao mba hanatona an'Andriamanitra toy ny Ray ao an-danitra.
Ampianaro hifehy tena izy ireo amin'ny alalan'ny ohatra asehonao eo amin'ny fitondrana ny tokantrano. Ampianaro izy ho tia manampy ao an-tokantrano. Hameno ny sainao amin'ny eritreritra sarobidy indrindra ny Fanahy Masina rehefa miasa ho an'ny famonjena ny tenanao sy ny zanakao ianao.
Ry ray aman-dreny, angony ireo tara-pahazavana mamirapiratra eny amin'ny lalan-kalehanareo. (...) Rehefa manao ny asa famonjena ny zanakareo ianareo sy manao izay hihazonana ny toeranareo eo amin'ny lalan'ny fahamasinana, dia hiseho ny fizahan-toetra mahavery hevitra indrindra. Aza miraviravy tanana anefa. Mifikira amin'i Jesôsy; hoy Izy: "Aoka hifikitra amin' ny heriko kosa izy ka hihavana amiko; eny, aoka hihavana amiko izy" - Isa. 27:5.
(...) Rehefa misy ny hamehana dia anontanio Izy hoe: "Tompo ô, inona indray izao no tokony hataonay?" Raha mandà tsy hitroatra ianareo na hitaintaina na koa hisafoaka, dia haneho anareo ny lalana hivoahana ny Tompo.
(...) Ataovy izay rehetra azonao atao hananana fomba fijery ambony eo anatrehan'ny zanakao. Amin'ny fanarahana ny fomban'i Kristy sy ny fifikirana mafy amm'ny teny fikasan'Andriamanitra no hahatonga anao ho evanjelisitra ao an-tokantrano sy mpitondra fahasoavana ho an'ny zanakao. SMC, 185.