"Koa amin'izany dia miendrika mba hatao tahaka ny rahalahiny amin'ny zavatra rehetra Izy, mba ho Mpisoronabe mamindra fo sy mahatoky ny amin’Andriamanitra, mba hanaovany fanavotana noho ny heloky ny olona." — Heb. 2:17.
Mofon’aina:
Aoka ny olombelona, izay hazan'ny fakam-panahy mandrakariva, ahatsiaro fa manana Mpisoronabe izay mahalala tsara ny fahalemeny izy, satria Izy koa dia efa mba nalaim-panahy tahaka azy ireo ihany. Ary aoka ireo izay eo amin' ny toerana misy andraikitra hahatsiaro fa eo ambanin'ny herin'ny fakam-panahy mandrakariva izy ka mila miankina tanteraka amin'ny fahamendrehan'ny Mpamonjy. Na masina toy inona aza ny asa niantsoana azy, dia mpanota ihany izy ireo, ary tsy hahazo famonjena raha tsy amin'ny fahasoavan'i Kristy irery ihany. Tsy maintsy hijoro eo anatrehan'ny seza fiandrianan'Andriamanitra izy indray andro any, na voavonjy tamin'ny ran'ny Zanak'ondry, na voaheloka amin'ny famaizana natokana ho an'ny ratsy fanahy. (…)
Endrey ny alahelon'i Kristy noho ny tsy fifanehoan'ny vahoakany fitiavana sy fahalemem-panahy! Voamariny ny teniny sy ny lantom-peony. Reny ny fitsarana henjana sy masiaka atao amin'ireo izay nanehoany fitiavana tsy manam-petra teo anatrehan'ny Ray. Henony avokoa ny senton'alahelo sy fahoriana rehetra ateraky ny fahasiahan'olombelona, ka ory indrindra ny Fanahiny.
Tsy mahay manao ny tsara isika raha misaraka amin'i Kristy. Tsy mitombina, noho izany, ny fanindrahindran'ny olombelona ny tenany! Mahagaga ny fanadinoany fa mila mibebaka izy, tahaka ireo namany ihany, ary ireo izay melohiny fatratra dia azo hamarinina eo anatrehan'Andriamanitra rehefa nandray ny firaisam-pon'i Kristy sy ny anjely.
Aoka ny irak'Andriamanitra hiasa toy ny lehilahy sy vehivavy hendry. Aoka ny fanahiny tsy hiavonavona fa hanetry tena kosa (Isa. 57:15). (...)
Miaro izay rehetra alaim-panahy i Kristy, kanefa mandritra izany, dia maro amin'ny vahoakany no manao izay mampalahelo Azy amin'ny fiandaniany amin'i Satana sy ny fiampangana ny rahalahy sy ny anabaviny amin'ny fanondroana ny fitafiany maloto.
Aoka tsy ho kivy ireo izay kianina, satria na manameloka azy aza ny hafa, i Kristy kosa dia milaza aminy hoe: "Efa vitako tombo-kavatsa eo am-pelatanako hianao. Ahy ianao, amin'ny alalan'ny famoronana sy ny fanavotana." — RH, 17 Marsa, 1903.