"Koa araka my ananantsika andro hanaovana, dia aoka isika hanao soa amin'ny olona rehetra, indrindra fa amin'ny mpianakavin'ny finoana "Gal. 6:10.
Napetrak'i Kristy tamin'ny fomba tamin'ny fiangonany ny adidy momba ny fikarakarana ny sahirana amin'ireo mambra ao aminy. Ekeny ho ao anatin'ny faritry ny fiangonana ireo mahantrany. Tsy maintsy ho eo amintsika mandrakariva ireo, ary ankininy amin'ny mambran'ny fiangonana ny andraikitra manokana hikarakara azy ireny. Tahaka ny mambran'ny ankohonana, mifampiahy, mikarakara ny marary, manohana ny reraka, mampianatra ny bado, manofana ny vao mianatra, dia toy izany koa ny mpianakavin'ny finoana, mikarakara ireo tsy mana-mpiahy ao aminy.
Adidin'ny fiangonana tsirairay ny mandrafitra fandaminana amim- pitandremana sy amim-pisainana tsara momba ny fikarakarana ireo mahantra sy marary ao aminy. Ny tsirambina, na kely aza, ataon'ny mpanara-dia an'i Kristy, ny tsy firaihana amin'ny fanamaivanana ny fahasahiranan'ireo rahalahy na rahavavy milanja ny ziogan'ny fahantrana sy ny fahoriana, dia voarakitra ao amin'ny bokin'ny lanitra toy ny natao tamin'i Kristy, izay ao amin'ny olony masina. Maro be ireo izay hampamoahina eo anatrehan'ny Tompo noho ny fitoriany ny tenin'i Kristy amin'ny hafa, nefa tsy mba mangoraka na mihevitra ireo mpiray fanantenana aminy izay tsy mba manana tombontsoa sy fahombiazana tahaka azy.
Izay naman'ny mahantra no tena Kristianina marina. Toy ny fikarakarany zava-maniry marefo sy malefaka ary mora malazo no ikarakarany ny rahalahiny (na rahavaviny) ao anatin'ny fahaverezan-kevitra. Tian'Andriamanitra hankeo anivon'ny marary sy ny mijaly ireo mpiasany mba ho mpampita ny hafa-pitiavany sy ny hafa-pamindrampony. Manara- maso antsika Izy, mijery ny fomba fifampitondrantsika, tahaka an'i Kristy ve isika amin'ny fitondrantsika ny olona rehetra, na ambony na ambany.na manankarena na mahantra, na olona afaka na andevo?
Tsy misy iadian-kevitra ny amin'ireo mahantran'ny Tompo ireo. Tsy maintsy ampiana izy ireo amin'izay mahasoa azy amin'ny fotoana rehetra. - MLT, L. 245.