"Tsy varidimiventy ihany va no vidin'ny tsintsina roa? Nefa tsy misy na dia iray akory aza amin'ireny ho latsaka amin'ny tany, raha tsy avelan'ny Rainareo." — Mat. 10:29.
Mofon’aina:
Entin'Ilay Mpampianatra Lehibe hifandray amin'ny zavaboary ny mpihaino Azy mba handrenesany ilay feo izay miteny amin'ny voary rehetra. Rehefa mihamalefaka ny fony ary vonon-kandray ny sainy dia nampiany hahatakatra ny fampianarana ara-panahy ao ambadik'izay hitan'ny masony izy ireo. Ireo fanoharana, izay fomba tena tiany hampitana ny leson'ny fahamarinana, dia maneho ny fivelaran'ny Sainy eo amin'ny hery miasa manginan'ny zavaboary sy ny fitiavana manome lesona ara-panahy eo amin'ny fiainana andavanandro.
Ireo vorona eny amin'ny habakabaka, ireo lilia eny an-tsaha, ny mpamafy sy ny voa afafy, ny mpiandry ondry sy ny andian'ondriny, tamin'ny alalan'ireo no nanehoan'i Kristy sary an'ohatry ny fahamarinana tsy mety maty. Nandray toe-javatra teo amin'ny fiainana andavanandro koa Izy, zava-misy izay mahazatra ireo mpihaino Azy ny masirasira, ny harena miafina, ny perila, ny harato-tarihina, ilay farantsa kely very, ilay zanaka adala, ny trano teo ambony vatolampy sy fasika. Nisy zavatra mahaliana ny sain'ny rehetra sy antso niantefa tamin'ny fo hatrany tao amin'ny lesona nomeny. Amin'izany ny adidy andavanandro, raha nifantoka fotsiny tamin'ny asa ka mihazona ny saina tsy hisandratra ambony, dia hahazo fahazavana sy fanandratana avy amin' ilay mpampahatsiaro tsy miato momba ny zava-panahy sy ny tsy hita maso.
Tokony hampianatra isika, araka izany. Aoka ireo ankizy hianatra hijery eo amin'ny zavaboary ny fanehoana ny fitiavana sy ny fahen-dren'Andriamanitra. Aoka ny fisainana momba Azy hampifandraisina amin'ny vorona sy ny voninkazo ary ny hazo; aoka ny zavatra hita maso rehetra ho mpanambara ny amin'izay tsy hita maso, ary ny toe-javatra rehetra eo amin'ny fiainana ho fitaovana mahomby hampitan'Andriamanitra fahalalana.
Raha eo am-pianarana ireo lesona eo amin'ny voary rehetra sy ireo fanandramana eo amin'ny fiainana izy ireo, dia aoka hahatsapa fa ny lalàna mifehy ny zavaboary sy ny toe-javatra rehetra eo amin'ny fiainana no mifehy antsika koa. Nomena hahasoa antsika izany, ary ny fankatoavana izany ihany no ahitantsika ny tena fahasambarana sy ny tena fahombiazana. - Fk, tt. 111, 112.