Hodinihina mandritra ny herinandro: Sal. 78; Sal. 105; Gal. 3:29; Sal. 106; Sal. 80; Nom. 6:22-27; Sal. 135.
Tsianjery: "Izay efa rentsika sy fantatsika, ary nambaran'ny razantsika tamintsika, dia tsy mba hafenintsika amin'ny zanany; fa hambarantsika amin'ny taranaka ho avy ny fiderana an'i Jehovah sy ny heriny ary ny fahagagana izay efa nataony." - Sal. 78:3,4.
Ao amin'ny Salamo maro, ny fiderana dia miseho amin'ny endrika fitantarana ny asam-pamonjena mahagaga nataon'i Jehovah. Ny sasany manasa ny vahoakan'Andriamanitra handray lesona avy amin'ny tantarany, indrindra avy amin'ny fahadisoana nataon'izy ireo sy ny razany. Mibahan-toerana ny hira ao amin'ny sasany amin'ireny Salamo tantara ireny, izay manasongadina ny asa mahagaga nataon'Andriamanitra ho an'ny vahoakany tamin'ny lasa, ary koa manamafy ny fitokian'izy ireo amin'i Jehovah, Izay mahatoky sy mahay manafaka azy ireo amin'ny ady sarotra atrehiny.
Izao no mampiavaka ny Salamo tantara: ampiany isika hahatsapa fa ny tantaram-piainantsika dia ao anatin'ny tantaran'ny vahoakan'Andriamanitra, ka ny tantara lasa dia tantaran'ny lasantsika. Koa satria voaray ho isan'ny fianakaviam-ben'ny vahoakan'Andriamanitra ara-tantara isika noho i Kristy (Rom. 8:15; Rôm. 9:24-26; Gal. 4:6,7), dia tantaran'ireo razantsika ara-panahy tokoa ny tantara lasan'ny vahoaka Isiraely fahiny. Noho izany dia afaka mandray ary tokony handray lesona avy amin'ny lasan'izy ireo isika, izay lasantsika koa.
Ny tanjona farany dia ny hahatsapan'ny taranaka tsirairain'ny vahoakan' Andriamanitra fa samy manana anjara kely kanefa tena manan-danja ao anatin'ilay tantara lehiben'Andriamanitra, ao anatin'ny ady ifanandrinan'ny tsara sy ny ratsy izy ireo.