"Nahoana hianareo no mandany vola amin'izay tsy hanina, ary ny vokatry ny fisasaranareo amin'izay tsy mahavoky? Mihainoa dia mihainoa Ahy, ka hano izay tsara, dia aoka hiravoravo amin 'ny matavy ny fanahinareo." - Isa. 55:2.
Mofon’aina:
Maro amintsika, na dia mitandrina fatratra tsy hihinana sakafo tsy mahasalama aza, no manao tsirambina ny fihinanana sakafo misy ireo otrikaina ilaina amin'ny fikolokoloana ny vatana. Ireo izay manana fomba fjery tendrony loatra ny fanavaozana ara-pahasalamana dia atahorana hanao fahazarana ny mihinana sakafo tsy misy tsirony, izay hataony matsatso loatra ka zary tsy hahafa-po. Ny sakafo karakaraina dia tokony ho sady maha-te hihinana no mitondra otrikaina. Tsy tokony hesorina amin'ny sakafo ny singa ilain'ny vatana. (...)
Na dia misy aza ny fampitandremana mikasika ny loza ateraky ny aretina azo avy amin'ny dibera, sy ny maharatsy ny fampiasana atody ho an'ny ankizy madinika, dia tsy tokony heverina ho fandikana ny foto-kevitra ny fampiasana ny atody azo avy amin'ny akoho voakarakara tsara sy voafahana araka ny tokony ho izy. Ny atody dia manasitrana ny vatana satria maro amin'ny poizina sasantsasany.
Ny sasany, izay mifady ronono, atody sy dibera, dia tsy nanome araka ay tokony ho izy ho an'ny vatany ny otrikaina ilainy, ary vokatr'izany dia mihaosa ny tenany ary tsy mahavita miasa. (...) Ny filazantsara dia natao hitondra firindrana ho an'ny taranak'olombelona mpanota. Ny filazantsara dia natao hitarika ny mpanankarena sy ny mahantra ho eo an-tongotr'i Jesôsy.
Ho avy ny fotoana izay tsy maintsy ialantsika amin'ny sasany amin'ireo sakafo fihinantsika ankehitriny, toy ny ronono, ny hero-dronono sy ny atody; kanefa tsy dia ilaina ny miteraka adin-tsaina amin'ny alalan'ny fameperana aloha loatra sy diso tafahoatra. Aoka handrasana hitaky izany ny toe-javatra, ary efa manomana ny lalana ho an'izany ny Tompo. (...)
Aoka isika tsy hanohitra ny fanavaozana ara-pahasalamana ka hihinana sakafo mahasalama sy tsara tsiro ho solon'ny sakafo mankarary izay nialantsika.
Aza mampirisika velively ny fironana ho amin'ny zavatra manaitaitra. Aoka tsy hihinana afa-tsy sakafo tsotra sy mahasalama, ary misaora mandrakariva an'Andriamanitra noho ireo foto-kevitry ny fanavaozana ara-pahasalamana. Amin'ny zavatra rehetra dia aoka ho marina sy mahitsy, dia hahazo ny fandresena sarobidy ianareo. —RH, 03 Marsa 1910.