"Amin 'ny fanahiko no aniriako Anao nony alina; eny, ny saiko ato anatiko no itadiavako Anao fatratra; fa mamely ny tany ny fitsaranao, dia mianatra fahamarinana ny mponina amin 'izao tontolo izao." – Isa. 26:9.
Mofon’aina:
Ny fitiavan'ny Mpamonjy no manery ireo iraka hitondra ny hafatra any amin'ireo izay very. Endrey, mahatalanjona manao ahoana loatra re ny fahalianana sy ny ezaka ataon'i Kristy ho an'ny mpanota e! Na dia atositosika sy hitsakitsahina mafy amin'ny fo vato aza ny Fitiavany, dia mbola miverina miangavy sy mitalaho amin-kery lehibe Izy manao hoe: "Indro efa mitsangana eo am-baravarana aho ka mandondona." – Ap6k. 3:20. Misarika sy mambabo amin-kery tsy mety resy ny Fitiavany mandra-pahatongan'ny fanahy ho voataona hanatona.
(...) Mambabo azy ireo amin'ny Tenin'ny fitiavany sy ny heriny Izy; satria ny Tenin'Andriamanitra no tsorakazon'ny Heriny. Izao no lazainy: "Tsy tahaka ny afo va ny teniko? hoy Jehovah, ary tsy tahaka ny kanonta manorotoro ny vatolampy va?"– Jer. 23:29.
Rehefa alefan'ny Fanahy Masina ao am-pon'ny olona ny Tenin' Andriamanitra, dia mahery tokoa izany ka mandrodana ireo mandan' i Satana. Tsy misy azon'ny lehilahy sy vehivavy voafetra atao manoloana ilay fifanandrinana goavana, raha tsy noho ny Tenin'Andriamanitra ihany. Tsy hain'izy ireo ny hikasika amim-pahombiazana ny fon'ny olombelona izay mafy sy miziriziry ary mikatona sy mihidy (...). Na izany aza dia omen'Andriamanitra fahendrena ny lehilahy sy ny vehivavy, ka ny fanahy faran'izay malemy dia afaka ny ho tonga tahaka an' i Davida noho ny finoana an'Andriamanitra.
Raisin'ny Tompo ho Azy ireo izay feno fanoloran-tena, eny, fa na dia lehilahy sy vehivavy tsy nahitafianarana sy tso-piaina aza, ka irahiny handroso hitondra ny hafa-pampitandremany. Manetsika ny fon'izy ireo amin'ny alalan'ny Fanahiny Izy; omeny tanjaka sy hery ara-panahy izy ireo, koa dia afaka handroso miaraka amin'ny Tenin'Andriamanitra sy hitaona ny olona hanatona. Amin' izany dia fanahy maro mahantra sy osa, izay maty mosary sy maniry mafy ny Mofon'ny fiainana no hiala avy amin'ny fahalemeny ka hohatanjahina. (...) — RH, 24 Septambra 1895.