"Dia nanokatra ny sain'ireo izy hahalala ny Soratra Masina." - Lio. 24:45.
Mofon'Aina:
Irin'ny Tompo ny hananan'ny tsirairay avy amintsika fanandramana lalina sy tsara kokoa mikasika ny fahalalana ny Tompontsika sy i Jesôsy Kristy Mpamonjy. Iriny ny hitomboantsika amin'ny fahalalana - tsy ny zavatry ny tany fa ny zavatry ny lanitra, izay mikasika an'i Kristy ilay Mpitarika antsika velona. Endrey, fahalalana ambony sy lehibe manao ahoana re izany! (...)
Fantatsika fa ho avy tahaka ny riaka mahery ny fampianaran-diso, ary izany indrindra no antony aniriantsika ny tara-pahazavana rehetra izay alefan'Andriamanitra ho antsika, mba hahatonga antsika ho tafajoro eo anatrehan'ny toe-java-tsarotra amin'ny andro farany. (...)
Ô! Irin'i Kristy ny hanala sarona ho antsika ireo zava-miafin'ny fanavotana! Naniry ny hanao izany ho an' ireo mpianany Izy fony niaraka tamin'izy ireo tety an-tany, kanefa kely dia kely ny fahalalan'izy ireo ny zava-panahy ka tsy takany ny Teniny. Tsy maintsy nanao izao teny izao tamin'izy ireo Izy: "Mbola manana zavatra maro holazaina aminareo Aho, nefa tsy zakanareo ankehitriny." - Jao. 16:12. Endrey! Ho nahazaka ny fitsapana mahatsiravina izay tsy maintsy nolalovany tamin'ny fotoana nitsarana an'i Jesôsy sy ny nanomboana Azy izy ireo raha toa nandroso ary koa nazoto nihaino ireo toromarik'i Kristy! Moa ve tsy havelantsika hanokatra ny saintsika i Jesôsy mba hahatakarantsika? (...)
Eo amoron' ilay tontolo mandrakizay isika, ary tsy maintsy manao fijoroana ho vavolombelona izay hifandrindra amin'ny lanitra manontolo.
Ho avy ny Tompo, ary tokony ho vonona isika! Iriko isa-tsegondra ny Fahasoavany - iriko ilay akanjom-pahamarinan'i Kristy. Tsy maintsy mampietry ny tenantsika eo anatrehan' Andriamanitra tahaka izay tsy mbola natao hatrizay isika; mankanesa eo an-tongotry ny hazo fijaliana, dia hataony eo am-bavanao ny teny holazainao momba Azy, eny ny fiderana an'Andriamanitsika koa aza. Hampianariny antsika ny feon-kira amin'ny hiran'ny anjely, eny ny fisaorana izay hatao amin'ilay Raintsika any an-danitra. Tsy mahay manao na inona na inona amin'ny herintsika isika, kanefa irin'Andriamanitra ny hikasika ny molotsika amin'ny vainafo avy eo amin'ny alitara. Iriny ny hanamasina ny lelantsika - ny hanamasina ny momba antsika manontolo. - TMK, t. 191.