"Fa izao no fitiavana an'Andriamanitra, dia ny hitandremantsika ny didiny, sady tsy mavesatra ny didiny." - 1 Jao. 5:3
Mofon’Aina:
Ny fitandremana ny didin'Andriamanitra no manome voninahitra sy haja Azy eo amin'ireo voafidiny. Izany no antony mahatonga ny fanahy rehetra izay nomen'Andriamanitra fahafaha-misaina hanana andraikitra ny handinika ny Teny sy hamantatra izay takin'Andriamanitra amintsika amin'ny maha-fananana novidiny antsika. Tokony hokatsahintsika ny fomba hahatakarana ny fitakian'ny Teniny rehetra. (...) Ny fomba ahafahantsika manome voninahitra lehibe kokoa an'ilay Andriamanitsika, izay Tompontsika noho ny amin'ny famoronana sy ny fanavotana, dia ny fanehoana amin'ireo mponin'ny lanitra sy ny tontolo tsy lavo ary ny olombelona lavo fa mankatò ny lalàny isika, dia ilay didy izay mifehy ny fitondram-panjakany.
Ilaintsika ny mianatra ampahazo-toana mba hananantsika fahalalana mikasika ny lalàn'Andriamanitra. Ahoana moa no hahatonga antsika ho mpankato raha toa tsy takatsika ny lalana izay mandrindra ny fitondram-panjakan'Andriamanitra? Rehefa izay dia sokafy ny Baibolinao ary diniho izay rehetra manazava anao mahakasika ny fitsipik'Andriamanitra; ary rehefa hitanao ny hoe "Izao no lazain'i Jehôvah ", dia aoka tsy hanontany ny hevitr'olombelona fa mankatoava am-pifaliana na inona na inona sandan'izany. Amin'izany no hitoeran'ny fitahian'i Jehôvah aminao. (...)
Angataho amim-bavaka matetika izao: "Tompo ô! Inona no asainao ataoko? Inona amin'izay ataoko no manao tsinontsinona ny fitsipikao? Moa ve misy zavatra ataoko izay ametrahako ny hery miasa mangina avy amiko ho eo amin'ny laharan'ny fahavalo? Moa ve aho maneho tsy firaihana manoloana ny didin'Andriamanitra? Moa ve aho vonona hiara-mitondra ny ziogan'i Kristy sy hilanja ny enta-mavesatra ary ho mpiara-miasa Aminy? Moa ve aho mitady fialan-tsiny tsy hankatoavana ny "izao no lazain'i Jehôvah"? Moa ve aho mankahatra ny loza amin'ny fanaovan-tsinontsinona ny fankatoavana ny fitsipika voalazan'i Jehôvah mazava noho ny tsy fahafoizako hisaraka amin'izao tontolo izao? (...)"
Miantoraha eo amin'Andriamanitra ka lazao hoe: "Tompo ô! Atolotra ho Anao ny tenako; izay no hany azoko atao! Tsy ho hita ho mpandika ny lalànao anie aho, satria hametraka ahy eo amin'ny laharan'ny fahavalo izany." - TMK, t. 297.