Vakio ny Sal. 136. Inona ny hevitra mibahana ao amin'io Salamo io? Aiza no ahitan'ny mpanao Salamo ny porofon'ny fanambarany miverimberina?
Ny Sal. 136 dia mitaona ny vahoakan'Andriamanitra hidera Azy noho ny famindram-pony izay aseho eo amin'ny zavaboary (Sal. 136:4-9) sy ny tantaran'ny Isiraely (Sal. 136:10-22). Ny hoe "Famindram-po" (khesed amin'ny teny hebreo, "fitiavana mafy orina") dia manambara ny fahatsaran'Andriamanitra sy ny fahatokiany amin'ny zavaboariny sy ny fanekena nifanaovany tamin'ny Isiraely. Asehon'io Salamo io fa mifototra amin'ny fitiavan'Andriamanitra mafy orina ny Heriny lehibe sy ny Fahalehibeazany.
Jehovah no "Andriamanitry ny andriamanitra" sy "Tompon'ny tompo"; fomba fiteny hebreo izay midika hoe "Andriamanitra Avo indrindra"- Sal. 136:1-3 izany, ary tsy misy andriamanitra hafa fa Izy irery ihany no Andriamanitra.
Ny fahagagana lehibe ataon'Andriamanitra, izay tsy misy mahavita afa-tsy Izy irery ihany, no fanehoana tsy azo lavina ny fanapahany (Sal. 136:4). Izy no namorona ny lanitra sy ny tany ary ireo zavatra eny amin'ny lanitra izay iankohofan'ny mpanompo sampy (Deo. 4:19). Ambaran'ny Salamo fa tsy manana fahefana ireo andriamanitra sampy sy izay rehetra fitokiana amin'ny olombelona ankapobeny. Zavatra nataon'ny tanana ihany ireny, zavatra nohariana fa tsy ny Mpahary, fahasamihafana lehibe tokoa izany.
Manasongadina ny fiasan'ny herin'Andriamanitra sy ny famindram-pony izay mahataka-davitra ny sarin'ny tanany mahery sy ny sandriny nahinjitra (Sal. 136:12).
Tokony hanentana ny vahoakan'Andriamanitra hitoky Aminy sy hitoetra ho mahatoky amin'ny fanekeny ny Famindram-pony amin'ny zavaboary sy eo amin'ny tantara. Averina in-26 ny hoe "Fa mandrakizay ny famindram-pony" ao amin'ny Salamo. Manome antoka ny mpivavaka izany fa tsy miova Andriamanitra ary hamerina ireo zava-tsoa tamin'ny lasa amin'ireo taranaka vaovao hifandimby. Mahatsiaro ny olony Andriamanitra (Sal. 136:23) ary mahatoky amin'ny faneken'ny fahasoavany. Ny finoana ny famindram-pon'Andriamanitra mandrakizay no ivon'ny finoana ara-Baiboly, izay ahitana fiankohofana amim-pifaliana sy fitokiana, ary koa fanajana sy fibebahana.
Faranana amin'ny fiahian'Andriamanitra an'izao tontolo izao ny Sal. 136 (and. 23- 25). Tsy ny Isiraely ihany no anehoan'Andriamanitra famindram-po fa ny zavaboary rehetra. Araka izany, miresaka momba ny fahasoavan'Andriamanitra mahavonjy izay mahatratra an'izao rehetra izao ny Salamo, ary koa mampirisika an'izao tontolo izao hiaraka amin'ny Isiraely hidera an'i Jehovah (jereo koa ny Lio. 2:10; Jao. 3:16; Asa. 15:17).
Amin'ny fomba ahoana no anehoan'ny nanomboana an'i Jesôsy teo amin'ny hazo fijaliana sy ny nahafatesany ho Mpisolo noho ny fahotantsika ny fahamarinana lehibe mikasika an' Andriamanitra (Ny fitiavany mandrakizay)?