"Navelan'Andriamanitra hamirapiratra teo amin'ny sain'ireo oIona nofidiny ireo ny fahazavana lehibe ka betsaka ny fahadisoan-kevitr'i Roma no nambarany taminy; nefa tsy naseho azy avokoa ny fahazavana rehetra izay tokony homena an'izao tontolo izao. Tamin'ny alalan'ireo mpanompony ireo, dia nitarika ny vahoaka hiala tamin'ny fahamaizinan'ny fivavahana Romana Andriamanitra nefa sady maro no lehibe ny zava-misakana tsy maintsy natrehina, ka nalefa miandalana sy tsimoramora ny fitarihana azy ireo. Tsy voaomana handray ny fahazavana amin'ny famirapiratany rehetra indray mitosaka izy fa mety ho jambena ny masony, ka hiverina ilalana izy, toy ny olona iray izay nitoetra ela tao amin'ny haizina, ka nifindra ho eo amin'ny famirapiratan'ny masoandro raha mitataovovonana. Noho izany dia nasehony tsikelikely tamin'ireo mpitarika izany, araka izay mety ho voarain’ny vahoaka. lsaka ny taonjato dia misy mpiasa hafa mahatoky hatrany nomena andraikitra hitarika ny vahoaka handroso ho amin'ny lalindalina kokoa amin'ny lalan'ny fanavaozana." - HM, t. 103.
"Tao amin'ny taratasy hafa nalefany ho an'ny pretra iray nanjary mpianatry ny filazantsara, dia niteny tamim-panetren-tena lalina momba ny fahadisoana nataon'ny tenany i Hus, ka niampanga tena ho `nahatsapa fahafinaretana tamin'ny fitondrana fitafiana sarobidy sy nandanilany fotoana foana tamin'ny zavatra maivana.' Dia nampiany izao hafatra mampangorakoraka izao: Aoka ny voninahitr'Andriamanitra sy ny famonjena ny fanahy no hameno ny sainao, fa tsy ny fahazoana tombony sy ny fananana. Tandremo ny mandravaka ny tranonao mihoatra noho ny fanahinao; ary ambonin'ny zavatra rehetra, aoka hokarakarainao tsara ny tranom-panahy. Aoka ho tia vavaka sy hanetry tena amin'ny mahantra ianao, ary aoka tsy ho ritran'ny fihinanam-be ny fanananao. Raha tsy manova ny fiainanao ianao ka tsy mifehy tena amin'ny aingitraingitra, dia matahotra aho sao hofaizina mafy tahaka ahy koa ianao.'" - HM, t. 106.
FANONTANIANA hifanankalozan-kevitra:
1. Inona no atao hoe "fahazavana miandalana"? Nahoana Andriamanitra no maneho ny fahamarinana amin'ny fomba miandalana? Ahoana no iharan'ireo fitsipika ireo amin'ny fiangonan'Andriamanitra ankehitriny?
2. Ahoana no ifandraisan'ny fahamarinana taloha izay efa takatr'ireo vahoakan'Andriamanitra amin'ny fahamarinana vaovao vao hita? Nahoana no tsy tokony hanohitra ny fahamarinana taloha na oviana na oviana ny fahamarinana vaovao?
3. Na aiza no aiza toerana onenanao, ny kolontsainao dia hampiroborobo ireo soatoavina sy hevitra ary fitsipi-pitondran-tena azo lazaina ho mifanohitra amin'ny fampianaran'ny Baiboly. Rehefa avy namantatra ireo sehatra ahitana fifanandrinana ireo ianao, ahoana no fahitanao ny tenanao sy ny fahitanao antsika amin'ny maha-fiangonana manoloana ireo fihaikana ireo? Ahoana no ahazoantsika mitoetra ho olom-pirenena vanona kanefa tsy milefitra amin'ireo soatoavina diso ambaran’ny kolontsaina iainantsika?
4. Inona no fiantraikan'ny taratasin'i Jean Huss eo amin'ny fisainanao ankehitriny? Inona no manaitra anao ao amin'ilay taratasy?