Vakio ny Asa. 20:27-32. Inona avy ireo fampitandremana manokana nomen'ny apostoly Paoly ireo mpitondra fiangonana tao Efesosy momba ny fihemorana ho avy?
Ny hanomana ny fiangonana amin'izay zavatra ho avy no tanjon'ny torohevitr'i Paoly. Maneho fanahiany roa lehibe izy ao amin'ireo andininy ireo.
Ny fanahiany voalohany dia "hisy amboadia masiaka hiditra eo aminareo izay tsy hiantra ny ondry" - Asa. 20:29. Izany hoe, hiatrika fanenjehana mahamay ny nnpino, saingy avy ao anatin'ny fiangonana ihany. Tamin'ny taonjato voalohany sy faharoa no nahatanterahan'izany faminaniana izany. Nampijalina, nampidirina am-ponja ary nodorana teo amin'ny antontan-kitay ireo Kristianina izay nanda tsy hiankohoka amin'ny amperora amin'ny fandohalehana eo anatrehan'ireo andriamanitr'i Roma.
Naneho ny fanahiany faharoa ny apostôly raha nilaza hoe: "Ary avy aminareo no hiposahan'ny olona sasany mitory teny tsy marina hitaona ny mpianatra hanaraka azy" - Asa. 20:30. Hiditra ao am-piangonana ny fampianaran-diso. Hosoloana foto-pampianarana diso ireo fahamarinan'Andriamanitra. Hanjaka ny fanaon'ny mpanompo sampy. Tamin'ny taonjato fahefatra sy fahadimy dia tafatsofoka mangina tao amin'ny fiangonana kristianina ny marimaritra iraisana, ka ho fampandrosoana ny asa no mety ho nanamarinana izany. Saingy ny voka-dratsy naterak'izany dia ny fandaozana ny fahamarinan'ny Tenin'Andriamanitra.
Vakio ny 2 Tes. 2:7-12. Ahoana no anoritsoritan'i Paoly apostôly ilay fihemorana ho avy? Inona ireo toetra mampiavaka izany, izay tokony hofantarin'izy ireo?
Manan-danja ilay fanazavan'i Paoly manao hoe: "Fa miasa sahady ny zava-miafina, dia ny tsi-fankatoavan-dalàna". Na tamin'ny andron'i Paoly aza dia nisy ny fihatahana tsikelikely tamin'ny fahamarinan'ny tenin'Andriamanitra mikasika ny fankatoavana ny lalàn'Andriamanitra.
Hahazo vahana izany mandritra ireo taonjato farany.
Natsofoka tao amin'ny fanompoam-pivavahana Kristianina ny sampy, izay mifanohitra amin'ny didy faharoa. Taona an'arivony maro no efa nametrahan'ny fivavahana jentilisa rehetra ny sampy ho eo amin'ny laharana voalohany. Mba hahatonga ny fivavahana Kristianina ho azon'ireo mpanompo sampy tafiditra tao amin'ny fiangonana kristianina nekena, dia novana anarana hoe "olo-masina" ireo andriamanitry ny mpanompo sampy. Nekena tsikelikely ho andro fivavahana kristianina ny Alahady, izay andro nivavahana tamin'ny andriamanitra masoandro, ho fanomezam-boninahitra ny fitsanganan'i Jesôsy tamin'ny maty. Mahazo vahana io andro sandoka io, izay tsy hamarinin'ny Soratra Masina, na dia ankehitriny aza.
Karazana marimaritra iraisana inona no hitantsika miditra ao amin'ny fiangonana ankehitriny? Zava-dehibe noho izany aza. Inona ireo marimaritra iraisana mety ataonao amin'izao fotoana izao? Amin'ny fampifangaroana ny marina sy ny diso ve izany indraindray?