Vakio ny VM, toko 58: "Ny Apôkalipsy", tt. 513-516.
Ny ankamaroan'ny fivavahan'izao tontolo izao dia mianina amin'ny fanazavana hevitra; misy fiavahana lehibe kosa ny fivavahana Kristianina, izay miorina lalina amin'ny tantara. Tantaran'ny fifandraisan'Andriamanitra amin'ny olombelona eo amin'ny tantara manontolo ny Baiboly, ary ny fandinihantsika izany fifandraisana nandritra ny arivo taona maro izany dia mampianatra zavatra betsaka antsika momba ny toetran'Andriamanitra tsy miovaova.
Indraindray anefa mitaraina ny Kristianina fa sasatry ny mandre hafatra mitovy hatrany izy ireo. Mazàna, rehefa torina amin'ny rehetra ny hafa-paminaniana mampiavaka antsika, dia mieritreritra isika fa efa nandre izany ka tsy misy zava-baovao ampianarina antsika amin'izany.
Ny toetra tsy miovaova sy marina ananan'ny hafatra entintsika anefa dia tsy midika fa tsotra loatra izany na tsy misy zava-tsarotra takin'izany. Ny mifanohitra amin'izany, rehefa dinihintsika ny hafatra omena antsika avy tao an-tsain'Andriamanitra tsy manam-petra, dia ho hitantsika vetivety foana fa hanovo mandrakariva ao amin'ny lohahevitra iray isika, kanefa tsy mety ho ritra mandrakizay izany.
Anisan'ny antony nanoratana ny bokin'ny Apokalipsy nofaritan'i Ellen G. White ny mba hampiorenana ny fiangonana kristianina amin'ny hafatra ara-tantara entiny ho an'ny vanim-potoana rehetra. "Nisy sasantsasany tamin'ny mpanompon'Andriamanitra mbola tanora fanahy [tamin'izany fotoana izany] (...) tsy nifikitra nifikitra intsony tamin'ireny fahamarinana fantatra loatra ireny. Zavatra tsy mbola fahita sy marevaka jerena no notadiaviny; koa dia niezaka izy mba hampiditra zava-baovao mamim-bahoaka." - VM, tt. 514,515. Araka izany dia tsy boky momba ny hoavy fotsiny izany, fa boky momba ny lasa koa, natao hampiorina antsika amin'ny finoana ara-tantara, mba tsy ho voafitaky ny faniriana hitady zava-baovao isika.
FANONTANIANA hifanakalozan-kevitra
1. Mahita hevitra sy fahatakarana vaovao mandrakariva isika ao amin'ny Soratra Masina. Ahoana no ahafahantsika mianatra zava-baovao kanefa sady tsy manadino ny maha-zava-dehibe ny tokony hiorenantsika mafy amin'ireo fahamarinana efa nomena antsika?
2. Ahoana no tokony ho fihetsiky ny fiangonana manoloana ireo hevitra vaovao entina hanazavana ny faminaniana? Fantatsika fa manan-java-baovao lanarana mandrakariva isika, kanefa ahoana no ahaizantsika manavaka raha tena ilaina tokoa ilay fahazavana vaovao, na sao dia fironan'ny besinimaro fotsiny izany, na koa fahadisoana mihitsy aza?
3. Nandritra ny Ady Lehibe Faharoa, raha teo ambavahoana ny tantsambo iray tany Pasifika, dia hoy izy tamin'ilay mpitsabo mpanampy: "Kamboty aho. Iza no mba hahatsiaro ahy rehefa maty aho?" Dia namaly ilay mpitsabo mpanampy hoe: "Tsy hanadino anao aho fa hahatsiaro anao mandrakariva". Na feno hatsaram-panahy aza ny tenin'io mpitsabo mpanampy lo, na ho ela na ho haingana dia tsy maintsy ho faty koa izy, ary hiara-maty aminy ny fahatsiarovana ilay kamboty. Ahoana no anampian'io tantara io antsika hahatakatra fa tsy misy antony na heviny ny fiainantsika manontolo raha toa ka ny fahafatesana no tompon'ny teny farany?