Tsy hay tombanana ny hasarobidintsika tsirairay eo imason’Andriamanitra, na dia sarotra amintsika aza ny mahazo an-tsaina izany. Izany no mahatonga Azy ho ravoravo ny amin'ny fanahy voavonjy, na iray monja aza.
Vakio ny Zef. 3:17. Ahoana no hanazavan'io andininy io ilay fanoharana momba ny zanaka adala?
Manasongadina ny haravoan'Andriamanitra ny amin'ireo olona navotany ny Zef. 3:17. Saika voangona ao amin'io andininy tokana io avokoa ny teny hebreo rehetra maneho hafaliana sy haravoana, manoritsoritra ny fifalian'Andriamanitra ny amin'ny olony izay navotany. Toa saika tsy ampy mihitsy aza ny teny hanambarana ny halehiben'ny fifalian'Andriamanitra amin'izany andro izany.
Mariho koa fa araka io andininy io dia "ao amin'ny olony" no misy an' Andriamanitra. Ny famitranam-pihavanana vokatry ny fifandraisam-pitiavana dia miaraka amin'ny fanatrehan'Andriamanitra. Eto dia "ao" amin'ny olony Andriamanitra, tahak tahaka ilay ray nahatazana ny zanany raha mbola lavitra, ka nihazakazaka nitsena azy.
Ahitana sary toy izany koa ao amin'ny Isa. 62:4, izay misy fanoharana momba ny fanambadiana. Araka io andininy io, ny vahoakan'Andriamanitra dia hantsoina hoe "llay sitrako", ary ny taniny hatao hoe "Vady ampakarina". Nahoana? Araka ny voalaza dia satria "sitrak'i Jehôvah hianao, ary ny taninao hampanambadina". Amin'ny andro hampodin'Andriamanitra amin'ny laoniny ny zavatra rehetra no faratampon'ny fifaliany, rehefa handray ny olony sy hiravoravo amintsika Izy, tahaka ilay ray faly tamin'ny niverenan'ilay zanany nania.
Vakio ny Efes. 5:25-28. Inona no ambaran'izany amintsika momba ny karazam-pitiavana tokony hananantsika sy asaina asehontsika?
Miantso ny lehilahy ho tia ny vadiny "tahaka ny nitiavan'i Kristy ny fiangonana ka nanolorany ny tenany hamonjy azy", sy ho tia azy "tahaka ny tenany", ireo andininy ireo. Tsy manasongadina fotsiny ny fitiavana tsy tia tena sy mahafoy tena tokony hananan'ny lehilahy amin'ny vadiny io andalan-tSoratra Masina io, fa mampiseho koa ny fitiavan'i Kristy ny olony (ny fiangonana) tahaka ny Tenany.