Vakio ny Fil. 2:25-30. Ahoana no anoritsoritan'i Paoly an'i Epafrodito? Inona avy ireo fomba amam-panaon'io mpanompo kristianina io izay mampiseho ny toetrany?
Tsy voalaza afa-tsy ato amin'ity epistily ity ny amin'i Epafrodito, kanefa manambara zavatra betsaka momba azy izany filazalazana fohy izany. Raha jerena ny anarany (izay manondro ny fivavahana amin'i «Aphrodite»), dia olona mpanompo sampy niova fo izy. Ny fiantsoan'i Paoly azy hoe "mpiray asa amiko" dia manondro fa nazoto nanompo izy, angamba niara-niasa tamin'i Paoly tany Filipy. Ny hoe "miaramila namako"indray (ampitahao amin'ny Fil. 1:27) dia inoana fa manondro ny ady natrehin'i Epafrodito teo am-pitoriana ny filazantsara, izay saika namoizany ny ainy mihitsy aza (Fil. 2:30).
"Irakareo" (Grika, apostolos) koa no ilazan'i Paoly an'i Epafrodito, izany hoe notendren'ny fiangonana tany Filipy izy, ary nirahina hanompo an'i Paoly tao am-ponja sy hanome izay rehetra mety ho nilainy (Fil. 2:25). Izy no nanankinan'ny Filipianina ireo vola homena an'i Paoly (Fil. 4:18). Tena zava-dehibe ireo fanomezana ireo satria ny sakafo, ny fitafiana, ny fandriana, na ny zavatra hafa mety hilain'ny gadra romana dia tsy maintsy novidina tamin'ny volany manokana na omen'ny fianakaviany sy ny namany ho azy (ampitahao amin'ny Asa 24:23). Tamin'ny faramparan'ny fotoana naha tao an-tranomaizina azy fanindroany tany Roma, dia nangataka an'i Timoty i Paoly hoe: "Mazotoa hankaty alohan'ny ririnina"sy hoe: "ilay kapôtiko navelako tany Troasy (...) dia ento raha mankaty hianao" - 2 Tim. 4:21,13. Nilain'i Paoly ilay akanjony volon'ondry matevina tao amin'ny tranomaizina tranovato mangatsiaka nisy azy. I Epafrodito koa no nanankinana ny fitondrana ity epistily ity niverina tany Filipy (jereo ny VM, tt. 417,418).
Azo inoana fa noho ny olona nisy tany Filipy (jereo ny Lesona 4), dia nihevitra i Paoly fa tokony hampandeha an'i Epafrodito aloha kokoa ho any amin'izy ireo, ka nanafatra ny Filipianina hoe: oraiso ao amin'ny Tempo izy amin'ny fifaliana indrindra» - Fil. 2:29. Tian'i Paoly ho azo antoka fa tsy mitebiteby momba azy any am-ponja izy ireo. Nohamafisiny koa fa olona tokony homen-kaja eo amin'ny Kristianina i Epafrodito, tsy noho ny hareny na ny toerana misy azy eo amin'ny fiarahamonina, fa noho ny toe-tsainy feno fahafoizan-tena amin'ny fanarahana ny ohatr'i Jesosy (Fil. 2:6-11,29,30; ampitahao amin'ny Lio. 22:25-27). Tsy dia fahita firy ao amin'ny TV ny teny grika nadika hoe «omeo voninahitra». Nampiasaina izany nilazana ny mpanompon'ilay kapiteny ao amin'ny Lio. 7:2, sy ireo olona mihaja omena fitoerana aloha any amin'ny fanasana, ao amin'ny Lio. 14:8, ary i Jesôsy , Izay vato velona, fehizoro, vato voafidy sady (Sara» ao amin'ny 1 Pet. 2:4,6. Lehilahy mahatoky tokoa izany i Epafrodito matoa nampidirina ho isan'izany vondrona izany.