Vakio "Ny Nanaterana an'i Isaka ho Fanatitra", toko faha- 13 ao amin'ny PM ary ny "Tao amin'ny fitsaran'i Pilato" ao amin'ny IFM, toko faha-77.
Niankohoka teo an-tongotr'i Jesôsy i Tômasy ka niantsoantso hoe: "Tompoko sy Andriamanitro!"
"Noraisin'i Jesôsy ny fiaikena nataony, nefa niteny azy mora ny amin'ny tsy finoany Izy: 'Ry Tomasy, satria nahita Ahy hianao, dia nino, sambatra kosa izay tsy nahita, nefa nino. Nety ho nahafinaritra an'i Kristy bebe kokoa ny finoan'i Tomasy raha nety nino izy noho ny fanambarana nataon'ny rahalahiny. Raha manaraka ny ohatra nomen'i Tomasy izao tontolo izao ankehitriny, dia tsy hisy hino ho amin'ny famonjena:
Maro no mirona ho amin'ny fisalasalana ka manala tsiny ny tenany amin'ny filazana fa raha nanana ny porofo noraisin'i Tomasy avy amin'ny namany izy, dia hino. Tsy tsapany fa tsy io porofo io ihany no ananany, fa mihoatra lavitra noho izany. Maro no tahaka an'i Tomasy, miandry ny hialan'izay rehetra mampisalasala azy, izay tsy hahatsapa na oviana na oviana izay ilainy. Mihamitombo miandalana ny tsy finoany. Izay mitaiza ny tenany hijery ny lafiratsin'ny zavatra, ka mimenomenona sy mitaraina dia tsy mahalala izay ataony. Mamafy voan'ny tsy finoana izy, ka hanana vokatry ny fisalasalana hojinjana. Amin'ny fotoana izay tena ilana ny finoana sy ny fahatokiana, dia maro no hahita fa tsy manan-kery hanantenana sy hinoana izy." IFM, t. 669, ed. 2023.
Fanontaniana ifanakalozan-kevitra:
1. Inona ny fahasamihafana manan-danja eo amin'ny fanehoan'i Abrahama ny finoany sy ny fanehoan'i Tômasy izany? Inona ny lesona azontsika sintonina avy amin'ny tantaran'izy ireo?
2. Omeo fotoana hanaovany fijoroana ho vavolombelona momba an'i Jesôsy , tahaka izay hitantsika ataon'ny olona ao amin'ny filazantsaran'i Jaona, izay maniry hanao izany, ao amin'ny kilasy. Na dia samy hafa aza ny tantara, inona no ambaran'ny olona, ary ahoana ny fijoroana ho vavolombelona ataony mikasika ilay Andriamanitra iray ihany izay tompointsika?
3. Nametraka fanontaniana lalina i Pilato: "Inona no marina?" Valio araka izay lesona nianarantsika tao amin'ny filazantsaran'i Jaona io fanontaniana io.
4. Jereo ireo faminaniana ao amin'ny Dan. 2 sy 7. Raha ireo toko roa ireo ihany no nananan'ireo tamin'ny andron'i Jesôsy, inona kosa ny tombontsoa lehibe ananantsika ankehitriny, mahakasika ny fahitana ny fahatanterahan'ireo faminaniana ireo, izay manome antony iray hafa hinoantsika?