Vakio ny "Amintsika Andriamanitra" toko 1 sy ny "Adihevitra" toko faha-66 ao amin'ny IFM.
"Tamin'ny nanetreny tena ka nandraisany teo Aminy ny maha-olombelona, dia naneho toetra amam-panahy mifanohitra amin'ny an'i Satana i Kristy. Nefa dia mbola nidina ambany kokoa teo amin'ny lalan'ny fanetren-tena Izy. 'Rehefa hita fa nanan-tarehy ho olona Izy, dia nanetry tena ka nanaiky hatramin'ny fahafatesana dia ny fahafatesana tamin'ny hazo fijaliana Fil. 2:8. Tahaka ny mpisoronabe nanaisotra ny fitafiany marevaka amin'ny maha-mpisorona azy, ka anaovany fanompoam-pivavahana mitafy ny rongony fotsy fanaon'ny mpisorona tsotra, toy izany koa i Kristy izay naka ny endriky ny mpanompo ka nanolotra fanatitra, ary tamin'izany dia Izy no mpisorona, ary Izy koa no sorona. 'Nefa Izy dia voalefona noho ny fahotantsika sy notorotoroina noho ny helotsika, ny fampijaliana nahazoantsika fihavanana no namelezana Azy.- Isa. 53:5.
Izay mendrika antsika no natao tamin'i Kristy, mba ho azo atao amintsika kosa izay mendrika Azy. Nomelohina noho ny fahotantsika izay tsy nananany anjara akory Izy, mba hahazoantsika hamarinina amin'ny alalan'ny fahamarinany izay tsy nananantsika anjara akory. Niaritra ny fahafatesana izay anjarantsika Izy, mba ahazoantsika mandray ny fiainana izay Azy. 'Ny dian-kapoka taminy no nahasitranana antsika."- IFM, tt. 11, 12, ed. 2023.
FANONTANIANA hifanakalozan-kevitra
1. Nanome betsaka tokoa i Jesôsy mba hamonjena an'izao tontolo izao. Araka ny hevitrao, inona ny fomba tsara indrindra hanampiana ny hafa hahita izany fahamarinana mahatalanjona izany ka hanatona Azy amin'ny finoana?
2. Inona ny fahasamihafana eo amin'ny fandraisana fanapahan-kevitra araka ny fisainan'olombelona sy ny fandraisana fanapahan-kevitra miorina amin'ny fanambaran'Andriamanitra?
3. Ahoana no ifandraisan'ny lôjika sy ny fahaiza-mandanjalanja amin'ny fahatakarana ny Tenin'Andriamanitra? Inona ny antony ara-lôjika sy ara-pisainana ananantsika mba hahatongavana amin'ny finoana? Ny fahatanterahan'ny faminaniana na koa ny fahatsaran-tarehy mahatalanjon'ny tontolo nohariana sy ny maha-tsy takatry ny saina izany dia mampitodika antsika ara-lôjika sy ara-pisainana ho amin'ny fisian'Andriamanitra sy ny fahamarinana momba ny drafi-pamonjena; amin'ny fomba ahoana?
4. Ao amin'ny kilasy, resaho ny valin-teninao tamin'ny fanontaniana ao amin'ny fiafaran'ny fizarana Talata. Miorina amin'inona ny finoanao? Raha misy manontany anao ny antony inoanao an'i Jesôsy sy ny fanambaran'ny Filazantsara, inona no havalinao azy?