Ampitahao amin'ny Jao. 14:6 ny Jao. 8:44. Inona no mampifanohitra ny toetran'i Jesôsy sy ny an'i Satana araka ny hita ao amin'ireo andininy roa ireo?
Marina izay Iazain'i Jesôsy satria Izy no tompon'ny fahamarinana. Avy ao amin'ny fon'Andriamanitra tapitr’ohatra amin'ny fahendrena sy ny fitiavana ary ny fahalalana no iavian'ny fahamarinana. Izy no fototra iorenan'ny zava-misy sy ny fahamarinana rehetra.
I Satana kosa dia mpandainga sady rain'ny lainga. Vonona ny hampiasa lainga sy famitahana izy, aolany ny fahamarinana ary fanovana ny fahamarinana izy mba hahadiso lalana ny vahoakan'Andriamanitra. Namitaka an'i Eva izy tao Edena tamin'ny alalan'ny fanolanany ny fahamarinana, ny fametrahany fisalasalana tao aminy, ary ny nandavany tsotra izao izay nolazain'Andriamanitra. Mifanohitra mazava amin'ny voalazan'Andriamanitra ny tenin'i Satana hoe "tsy ho faty tsy akory ianareo", raha ny fihinanana ilay voankazo no resahana. Nandritra ny taonjato maro no efa nampiasan'i Satana izany paikady izany. Tsy ahoan'i Satana ny fitokiana amin'ny Tenin'Andriamanitra, toheriny ny sitrapon'Andriamanitra voambara, aolany ny Soratra Masina, ary indraindray ampiasainy amin'ny tsy izy ny Baiboly mba hanohanany ny asany.
Vakio ny Ohab. 23:23, Jao. 17:17, ary ny Jao. 8:32. Inona no itovian'ireo andinin-tSoratra Masina ireo momba ny fahamarinan'ny tenin'Andriamanitra? Inona ny hafatra fototra ampitain'izy ireo?
"Fantatr'i Satana tsara fa hahatonga ny olona hahafantatra ny fitaka ataony sy hanohitra ny fahefany ny Soratra Masina. Na dia ny Mpamonjin'izao tontolo izao aza dia nahatohitra ny famelezany tamin'ny alalan'io teny io. lsaky ny fanafihany, dia nasehon'i Kristy ny ampingan'ny fahamarinana mandrakizay, ka hoy Izy hoe: «Voasoratra hoe». Ny tolo-kevitra rehetra ataon'ny fahavalo dia nosetrainy tamin'ny fahendrena sy ny herin'ny Tenin'Andriamanitra. Mba hahazoan'i Satana mitana ny fanapahany eo amin'ny olona sy mba hampiorenany mafy ny fahefan'ny papa ilay mpisando-pahefana, dia tsy maintsy ataony izay tsy hahalalan'izao tontolo izao ny Soratra Masina. Tokony hanandratra an'Andriamanitra ny Baiboly ary hametraka ny olombelona voafetra eo amin'izay tena toerany marina; noho izany dia tsy maintsy hafenina sy foanana ireo fahamarinany masina.
Izany foto-pisainana izany no noraisin'ny Fiangonana Romana. Nandritra ny taonjato maro dia norarana ny fielezan'ny Baiboly. Nosakanana tsy hamaky izany sy tsy hanana izany ao an-tokantranony ny olona, ary ny pretra sy ny eveka tsy ampy fiheverana no nanolana ny fampianaran'ny tenin’Andriamanitra mba hoentiny hanohana ny hambony. Noho izany dia nekena hatraiza hatraiza fa ny papa no solontenan'Andriamanitra eto an-tany, notolorana fahefana amin'ny fiangonana sy ny fanjakana." — HM, t. 51
Ifanakalozy hevitra ireo fomba ampiasain'i Satana ankehitriny mba hanolanana na hanazavana diso ny Tenin'Andriamanitra.