Tsy noho ny nitorian'ny mambra ny Filazantsara ihany no nampitombo ny fiangonana kristianina voalohany fa ny fiveloman'izy ireo ny filazantsara koa. Maneho ny asa fanompoan'i Kristy izay "nandeha eran'i Galilia ka nampianatra tao amin'ny synagogan'ny olona teo sy nitory ny filazantsaran'ny fanjakana ary nahasitrana ny aretina rehetra mbamin'ny rofy rehetra tamin'ny olona" ny mpino (Mat. 4:23). Nihevitra sy niahy fatratra ny olona i Jesôsy ary ny fiangonan'ny Testamenta Vaovao dia nanao toy izany koa. Izany fitiavana manda ny tena sy fanoloran-tena hamaly ny filan'ny olombelona izany, niaraka tamin'ny fizarana ny vaovao mahafalin'ny Filazantsara amin'ny herin'ny Fanahy Masina no nampisy fiantraikany teo amin'ny tontolo nandritra ireo taonjato voalohany nisian'ny fiangonana kristianina.
Vakio ny Asa. 2:44-47, Asa. 3:6-9, sy ny Asa. 6:1-7. Na dia miovaova aza ny toe-javatra, inona ireo fitsipika azontsika raisina avy amin'ireo andininy ireo momba ny fivavahana kristianina tena izy?
Nanaraka ny ohatra navelan'i Kristy ireo mpino ao amin'ny Testamenta Vaovao izay nambaran'i Petera fa "nohosorana tamin'ny Fanahy masina sy ny hery sady nandehandeha nanao soa sy nahasitrana izay rehetra azon'ny herin'ny devoly, satria Andriamanitra nomba Azy' - Asa. 10:38. Ny fiangonan'i Kristy no tenany eto an-tany, ary nandritra ireo taonjato voalohany dia naneho ny fitiavana mahafoy ny aina tahaka ny an'i Kristy izy ireo ary koa naneho ny fiahiany ny olombelona mijaly sy ory. Ohatra velon'ny fitiavan'i Kristy ireo mpino ireo.
Ao amin'ilay fifanandrinana lehibe mangotraka eto amin'izao tontolo rehetra izao, ny devoly dia maniry ny hanimba ny endrika an'Andriamanitra eo amin'ny olombelona. Ny tanjon'ny Filazantsara dia ny hamerina amin'ny laoniny ny endrik'Andriamanitra eo amin'ny olombelona, voafaoka ao anatin'izany famerenana amin'ny laoniny izany ny fanasitranana ara-batana, ara-tsaina, ara-pihetseham-po ary ara-panahy.
Ao amin'ny Jao. 10:10 no anambaran'i Jesôsy ny drafiny ho an'ny tsirairay avy amintsika. "Ny mpangalatra tsy avy raha tsy hangalatra sy hamono ary handringana; Izaho avy mba hananany fiainana, sady hananany be dia be." Iriny indrindra ny hananantsika vatana salama, saina matsilo, fihetseham-po milamina ary ho salama ara-panahy.
Manana ny fahamarinany manokana izany eo anatrehan'ny fiaviany izay efa nampanantenainy. Miatrika fotoan-tsarotra lehibe izao tontolo izao. Ny filazana mialoha ny hoavy nataon'i Jesôsy ao amin'ny Mat. 24 sy ny Lio. 21 dia manambara ireo toe-javatra mahatsiravina eto an-tany mialoha ny fiverenany. Rehefa mikasika antsika amin'ny fahasoavany manasitrana i Kristy dia manam-paniriana ny hikasika ny hafa amin'ny fikasihan'i Kristy isika mba hahasitranan'izy ireo. Maniraka antsika ho eo amin'ny tontolo potika i Jesôsy amin'ny maha-masoivohon'i Kristy antsika mba hikasika ny hafa amin'ny fitiavany. Nampiavaka ny fivavahana kristianina tamin'ny andron'ny Testamenta Vaovao ny fifankatiavan'ny samy Kristianina sy ny fitiavan'izy ireo ny fiarahamonina nisy azy.
Ifanakalozy hevitra: Inona no anjara asan'ny fiangonana ao amin'ny fiaraha-miasa amin'i Kristy mba hanaporofoana fa diso ireo fiampangan'i Satana?