Ilay Mpisolo avy any an-danitra

"Izay tsy nahalala ota dia efa nataony ota hamonjy antsika, mba ho tonga fahamarinan 'Andriamanitra ao Aminy kosa isika." - 2 Kôr. 5:21. 

Mofon’aina:
Namonjy ny sasany Izy, fa ny tenany tsy hainy vonjena." -Mar. 15:31 b. Noho ny tsy namonjen'i Kristy ny Tenany indrindra no ananan'ny mpanota fanantenana famelan-keloka na sitraka eo imason'Andriamanitra. Raha tsy nahomby na koa kivy i Kristy teo amin'ny fanatanterahana ny famonjena ny mpanota, dia tsy ho nisy ny fanantenana ho an'ny zanakalahy sy zanakavavin'i Adama rehetra. Feno fandavan-tena sy fahafoizan-tena ny fiainan'i Kristy manontolo; ary ny antony mahavitsy an'isa ny Kristianina mahatoky dia ny fibahanan'ny fampanaranam-po ny tena sy fanaovana izay mahafinaritra eo amin'ny toeran'ny fandavan-tena sy ny fahafoizan-tena. 

Endrey ny faniriana lalina ao amin'i Kristy sy ny hetahetany hamonjy izay very! (...) Tamin'ny fahafatesany teo amin'ny hazo fijaliana no namindrany ny fahamelohana avy teo amin'ny mpandika lalàna hankeo amin'ilay Mpisolo avy any an-danitra amin'ny alalan'ny finoana Azy ho Mpanavotra ny tenany manokana. Natao tao amin'ilay Antoka avy any an-danitra ny fahotan'ity tontolo meloka ity, izay (...)"mena tahaka ny jaky." (...)

Nanao ny asany ny maha-Andriamanitra Azy raha niari-pahoriana ny maha-olombelona Azy noho ny fankahalana sy ny valifatin'ny vahoaka tsy tia an'Andriamanitra, noho ny nanambarany ny Tenany ho Zanak'Andriamanitra. Izy irery no afaka namaly ilay jiolahy nahantra sy nijaly. (...) Hitan' ilay Mpanavotra efa ho faty teo amin'io jiolahy io ny heloka kely kokoa noho ny an'ireo izay nanameloka Azy ho faty. Tsy meloka noho ireo mpisorona sy mpanora-dalàna ary mpanapaka izay nafana fo tamin'ny fitakiana ny hahafaty ilay Zanak'Andriamanitra izy. 

Finoana manao ahoana re no hita tao amin'ity jiolahy efa niala aina teo amin'ny hazo fijaliana ity! Nandray an' Kristy izy tamin'ny fotoana izay toa nahitana fa tsy azo inoana ny maha-Zanak'Andriamanitra Azy (...). Nisy feo hafa noho izay re nanodidina teo tao amin'ny vavaka nataon' ilay jiolahy nahantra; feo nitory finoana izany, ary nipaka tany amin'i Kristy. (...) Feo mitory fanavotana sy famonjena no re teo anivon'ny fangirifiriana teo am-pialana aina. Nomem-boninahitra tao amin'ny Zanaka sy tamin'ny alalany Andriamanitra. - TDG, t. 236.