"Ary Elisa nivavaka hoe: Jehôvah mifona aminao aho, ampahirato ny masony mba hahitany. Ary Jehôvah nampahiratra ny mason' ilay zatovo; ary dia nahita izy, ka indro, ny tendrombohitra feno soavaly sy kalesy afo manodidina an'i Elisa." - 2 Mpanj . 6:17.
Mofon’aina:
Vitsy ihany no mba mandinika ny amin'ireo anjely tsy hita maso. Ny asan'ny olona dia na ho an'Andriamanitra, na ho an'i Satana, na ho an'ny Andrianan'ny fahazavana, na ho an'ny andrianan'ny haizina. Liana fatratra amin' izay ataon'ny olombelona, izay toa be raharaha ery kanefa tsy mihevitra ny zava-panahy, ny lanitra manontolo. Tsy misaina ny tenin'Andriamanitra na ny fampianarany izy ireo. Raha mba noraisiny mantsy ny Tenin'Andriamanitra dia ho gaga izy ireo fa misy anjely maro, tsara sy ratsy, manara-maso izay lazainy sy ataony rehetra. Misy azy ireny any amin'ireo fikambanana rehetra mpanao raharaham-barotra, any amin'ny filan-kevitra rehetra, any amin'ny fivoriam-bavaka rehetra. (...) Mpiara-miasa amin'Andriamanitra na amin'i Satana ireo anjely tsy hita maso ireo, ary miasa mafy sy tsy tapaka, mihoatra noho ny ataon'ny olombelona. Indraindray izy ireny no manala ny takona izay manakana ny olombelona tsy hahita ny tontolo tsy hita maso, mba hahafahan'ny saintsika miala amin'ny rotoroto sy ny hazakazaky ny fiainana sy mahazo an-tsaina fa misy mahita ny ataontsika sy lazaintsika rehetra eo am-panaovantsika raharaha, na rehefa mihevi-tena ho irery isika.
Tian'ny Tompo ho takatsika fa ireny anjely mahery mamangy ny tontolo misy antsika ireny dia mandray anjara mavitrika amin'ny asa izay heverintsika fa antsika. Fanahy manompo ireo anjely ireo, ary matetika izy no maka endrika olombelona. (...)
Tonga hanao ny anjarany eto amin'ity fiainana ity izy ireo. Efa nandray fitenenana tao anatin'ny fivoriana izy ireny, namelabelatra ny tantaran'ny olombelona teo anatrehan'ny mpivory, nanatanteraka asa izay tsy hain'ny olombelona atao. Imbetsaka izy ireo no efa jeneraly mpitari-tafika, na koa nirahina handroaka ny areti-mandringana. Efa niara-komana tamin' ireo ankohonana tso-piaina izy ireo, ary matetika no miseho ho toy ny mpandeha lanaky ny dia, mitady fialofana hiatrehana ny alina.
Aoka hazava tsara kokoa ao an-tsaintsika ny asan'ireo anjely mpamangy ireo. - UL, t. 84.