"Izany no ankalazana ny Raiko, mba hamoazanareo be ka ho tonga mpianatro hianareo." - Jao. 15:8
Mofon'aina:
Maro no mihemotra eo anatrehan'ny fiainana tahaka izay niainan'ny Mpamonjy. Mihevitra izy ireo fa lehibe loatra ny fahafoizana takina aminy mba hanahafany ilay Môdely, sy hitondrany ny voan'ny asa tsara, ary hanekeny amim-paharetana ny fandrantsanan'Andriamanitra hahafahany mamoa bebe kokoa. Rehefa mijery ny tenany tahaka ny fitaovana tsotra eo an-tanan'i Kristy anefa ny Kristianina, rehefa miezaka mba hanao amim-pahatokiana ny adidy rehetra izy ary miantehitra amin'ny fanampiana nampanantenain'Andriamanitra, dia hitondra ny ziogan'i Kristy ary hahita fa maivana izany (...). Azony atao ny miandrandra amin-kerim-po sy amin-toky ka hilaza hoe: "fantatro Izay inoako, ary matoky aho fa Izy dia mahatahiry ilay zavatra natolotro" - 2 Tim. 1:12.
Rehefa tojo zava-misakana ny lalantsika ary resintsika amim-pahatokiana izany; rehefa tojo fanoherana sy fanomezan-tsiny isika nefa mandresy amin'ny anaran'i Kristy; rehefa miantsoroka ny andraikitra sy manefa ny adidintsika araka ny toe-tsain'ilay Mpampianatra antsika isika -dia mahazo fahalalana sarobidy momba iny fahatokiany sy ny heriny tokoa. Tsy miantehitra amin'ny fanandraman'ny hafa intsony isika satria isika mihitsy no efa niaina ilay fanandramana. (...)
Arakaraka ny ibanjinantsika ny toetran'i Kristy, ary arakaraka ny iainantsika ny fanandraman'ny heriny mahavonjy no hahatsapantsika bebe kokoa ny fahalementsika sy ny toetrantsika tsy tonga lafatra, ary amin'izany no hanantenantsika Azy ho herintsika sy Mpanavotra antsika. (...) (...)
Rehefa mijery ny fiainan'ny olona izay nanana fitiavam-bavaka niavaka isika dia mihevitra matetika fa tsy mety ho tratrantsika ny fanandraman'izy ireo sy ny zava-bitany. Tsy izany anefa no izy. Maty ho an'ny rehetra i Kristy; ary manome toky antsika ny Teniny fa mihoatra lavitra noho ny fahavononan'ny ray aman-dreny ara-nofo hanome fanomezana tsara ho an'ny zanany ny fahavononany hanome ny Fanahiny Masina ho an' ireo izay mangataka izany.
Tsy tamin'ny fomba mahagaga tsy akory no nanefen'ireo mpaminany sy apôstôly toetra kristianina tonga lafatra, fa nampiasainy ireo fitaovana napetrak'Andriamanitra teo an-tanany, ary izay rehetra miezaka toy izany dia hahazo vokatra tahaka izay azon'izy ireo. - RC t. 97.