"Tsy azo afenina izay tanàna miorina eo an-tampon-tendrombohitra. Ary koa, tsy misy mandrehitra jiro ka mametraka azy ao ambanin'ny vata famarana, fa apetrany eo amin'ny fanaovan-jiro, ka dia mazava amin 'izay rehetra ao an-trano izany." - Mat. 5:14,15
Mofon’aina:
Hianareo no fahazavan 'izao tontolo izao" hoy i Kristy tamin'ireo mpianany (Mat. 5:14). (...) Tsy manana fahazavana azy manokana anefa izy ireo, fa ny taratry ny fahazavan'ny Lanitra no asaina asehony amin'izao tontolo izao.
"Tsy azo afenina izay tanàna miorina eo an-tampon-tendrombohitra. " Ny fisainantsika sy ny fikasantsika no loharano miafin'ny asa ataontsika, ary mamaritra ny toetrantsika (...). (...) Hitan'Andriamanitra mazava avokoa ny fisainantsika sy ny fihetseham-pontsika ary ny fironantsika, na dia tsy hitan'ny olombelona aza. (...)
Fijoroana ho vavolombelona manameloka ny fahotana sy ny mpanota ny fiainana masin'ny Kristianina sy ny resaka masina ataony. I Kristy anefa no tokony hasehony amin'izany fa tsy ny tenany. I Kristy no fanefitra lehibe ho an'ny ota. Nomen'ilay Mpanavotra be fangorahana antsika ny fanampiana rehetra ilaintsika. Vonona Izy ny hampitafy ny fahamarinany amin'izay mibebaka amin'ny fony marina, ary koa ny handrehitra ao am-pon'izany olona izany ny fitiavan'Andriamanitra (...). Andeha àry isika hanambara ny maha-vavolombelony antsika eto an-tany; ambasadaorony avy any amin'ny lapan'ny lanitra isika. Andeha homentsika voninahitra Ilay soloantsika tena amin'ny fijoroantsika ho mahatoky eo anatrehan'ny asa napetraka tamintsika, dia ny ho mpitondra fahazavana ho an' izao tontolo izao.
Izay hahazo ny fiainana mandrakizay amin'ny farany dia maneho hafanam-po sy fanoloran-tena ho amin'ny fanompoana an'Andriamanitra eto an-tany. Tsy hitsoaka adidy izy rehefa manatona ny fizahan-toetra sy ny zava-tsarotra ary ny faniniana. (...) Tsy hanao fanontaniana mitory fisalasalana izy rehefa aseho eo anatrehany ny fitakiana mazavan'ny Soratra Masina ka hanao hoe: inona no holazain'ireo namako raha miandany amin'ny vahoakan'Andriamanitra aho? (...)
Ambaran'i Jesôsy fa tsy menatra ny hiantso ireo mpanara-dia Azy amin'ny fo ho rahalahiny Izy. Hiandany amin'izy ireo ilay Andriamanitry ny fahamarinana ary tsy mba handao azy. Ho toy ny tombon-tsoa mandrakizay ho azy ireo ny fatiantoka azony noho ny amin'i Kristy. - RC, t. 379