"Aoka tsy hisy vato mahery sy reraka ao an-kitaponao. Aoka tsy hisy famarana mihoatra sy latsaka ao an-tranonao." - Deo. 25:13,14.
Mofon’aina:
Tokony hikolokolo firaisam-po sy fitiavana ho an'ny hafa ireo izay milaza fa tia sy matahotra an'Andriamanitra, ary tokony hihevitra ny tombontsoan'ny hafa toy ny an'ny tenany. Tsy tokony hitondra tena araka ny fitsipik'izao tontolo izao ny Kristianina. Niavaka tamin'izao tontolo izao ny vahoakan'Andriamanitra nandritra ny vanim-potoana rehetra, noho ny fiantsoana azy ireo ambony kokoa noho ny an'ny tsy mpino.
Ny fitiavam-bola no fototry ny ratsy rehetra. Ny faniriana tombontsoa no imatimatesan'izao taranaka izao. Raha tsy mety azo amin'ny alalan'ny asa mafy atao amim-pahitsiana ny harena dia katsahin'ny olona amin'ny alalan'ny fanambakana. Robaina amin'ny kamboty sy ny mpitondratena ny kely ananany, ary misahirana fatratra ny mahantra vao mahazo izay ilainy eo amin'ny, fiainana. Ataon'ny mpanan-karena izany rehetra izany mba hanohanana ny fitiavany rentirenty na koa hamaliana ny hetahetany ta hanangon-karena.
Mampivarahontsana sy mampi-horohoro ny fanahy ny heloka bevava mahatsiravina ataon'ny olona isan'andro noho ny amin'ny tombontsoa. Miantso fanetren-tena lalina sy asa matotra avy amin'ireo mpanara-dia an'i Kristy ny fahitana ireo fahotana ireo, izay miseho amin'ny fomba mahery vaika na malefaka kokoa na dia eo amin'izay mitonona ho mpivavaka aza. Nanjary fieren'ny jiolahy sy ny mpandroba izao tontolo izao noho ny fitiavan-kisehoseho sy ny fitiavam-bola. Tsy eto an-tany anefa no tena fonenan'ny Kristianina; vahiny eto amin'ny firenen-kafa ihany izy ireo (...). Tsy tokony ho ao aminy ny faniriana sy ny hery manosika hiasa izay ao amin'ireo manao ny eto ho fonenany sy mametraka ny hareny eto. Fanirian'Andriamanitra ny hisehoan'ny fiainan'Ilay Ohatra lehibe eo amin'ny fiainantsika: mba ho velona hanasoa ny hafa isika, tahaka an'i Jesôsy . (...)
Mihatra mivantana amin' i Kristy (...) ny ratsy atao amin' ireo zanak'Andriamanitra. Ny fiezahana rehetra haka tombontsoa avy amin'ny tsy fahalalan'ny hafa na ny fahalemeny na koa ny fahavoazany dia voarakitra ho fanambakana ao amin'ny boky firaketan'ny lanitra. - SW, 10 Mey 1904.