"Tsy mety amin'ny mpanjaka, ry Lemoela, eny; tsy mety amin'ny mpanjaka ny misotro divay, na amin'ny mpanapaka ny ho fatra-paniry toaka; fandrao, raha misotro izy, dia manadino ny lalàna ka mamily ny fitsarana ny zanaky ny fahoriana." - Ohab. 31:4,5.
Mofon’aina:
Tsy tokony hofidina hitana toeram-pitokisana ny olona tsy mahalala onony. Manimba ny hafa ny hery miasa mangina avy aminy (...). Amin'ny saina sy ny hoza-tatitra donton'ny paraky sy ny zava-manaitaitra no anaovany lalàna ka rehefa misava ny herin'ireny, dia miseho ny fitontonganana lehibe. Iankinan'ny ain'olona izany matetika, satria miankina amin'ny fanapahan-kevitr'ireo izay eo amin'ireny toerana ambony ireny ny ain'ny olona sy ny fahafahany (...). Zava-dehibe manan-danja indrindra raha toa izay mandray anjara amin'ireny raharaha ireny ka olona efa voazaha toetra, mandini-tena, mahatoky sy marina ary manana fahitsiana tsy azo hozongozonina, olona izay tsy mandray kolikoly ary tsy hamela ny fanombanany na ny faharesen-dahany momba ny marina havilin'ny fiangarana na ny hevitra mibahana mialoha.
Hoy ny Tompo: "Aza mamily ny rariny izay ananan'ny malahelo ao aminao, raha manana ady izy. Manalavira izay teny lainga, ary aza mamono izay tsy manan-tsiny sy izay marina ianao; fa tsy hanamarina ny meloka Aho. Ary aza mandray kolikoly, fa ny kolikoly mahajamba ny mason'ny mahiratra sy mamadika ny tenin'ny marina." - Eks. 23:6-8.- ST, 8 Jolay 1880.
Lehilahy sy vehivavy mahalala onony sy mahitsy ihany no tokony hekena hiditra ao amin'ny efitrano fitsarantsika (...). Tandindomin-doza ny fananan'ny olona sy ny fahamendrehany ary ny ainy koa aza, raha toa apetraka eo am-pelatanan'izay tsy mahalala onony sy maloto ara-pitondrantena ny fitsarana. Tsy manan-tsiny firifiry no voaheloka ho faty, ary akory ny habetsahan'ireo izay voaroba fananana, vokatry ny tsy fahamarinan'ny mpitsara sy ny mpisolovava ary ny vavolombelona ao anatin'ny fahamamoana! (...)
Ilaina amin'izao andro izao tokoa ny olona tahaka an'i Daniela - lehilahy sy vehivavy manana fandavan-tena sy herim-po hanao fanavaozana hentitra momba ny fahalalana onony. (...) Ary aoka ny rehetra hahatsiaro fa ny fahasambarantsika eto an-tany sy rahatrizay dia miankina amin'ny fanavaozantsika ny fiainana eto. - ST, 11 Febroary 1886.