"Ary hoy Jesôsy taminy: Hianareo dia mpanamarin-tena eo anatrehan'ny olona, nefa Andriamanitra mahalala ny fonareo; fa izay zavatra heverin’ny olona ho ambony dia fahavetavetana eo anatrehan’Andriamanitra." Lio. 16:15.
Mofon’aina:
Tokony hazonina eo amin'ny lafim-piainana rehetra ny fitsipika hentitry ny fahatokiana. Tsy ireo no fitsipika mifehy ity tontolontsika ity, satria i Satana — ilay mpamitaka sy mpandainga ary mpampahory - no tompony, ary manaraka azy sy manatanteraka ny fikasany ireo mpanompony. Tompo hafa kosa no tompoin'ny Kristianina, ary ao amin'Andriamanitra no tsy maintsy anatanterahany ny asany (...).
Mety ho zava-madinika no fahitan' ny olona sasany ny fiviliana kely amin 'ny fahitsiana tanteraka eo amin'ny fandraharahana, saingy tsy tahaka izany ny fijerin'ny Mpamonjintsika. Miavaka tsara sy mazava ny teniny momba izany: "Ary izay mahatoky amin'ny kely indrindra dia mahatoky koa amin'ny be" -Lio. 16:10. (...)
Mahatahotra tokoa ny fahabetsahan' ny fanambakana miseho eo amin'ny tontolo kristianina ankehitriny. (...) Ny fomba fanao tsy mahatoky izay manimba ny fifandraisan'ny lehilahy sy ny vehivavy amin'ireo olombelona namany dia tsy tokony hataon'ireo mitonona ho mpino ny fahamarinana ankehitriny na oviana na oviana. Mampidi-doza lehibe amin'ny fahamarinana ny vahoakan'Andriamanitra rehefa miala kely amin'ny lalan'ny fahitsiana.
Mety tsy ho tsara ny fisehoana ivelan'ny olona sasany, mety hanana kilema amin'ny lafiny maro izy, saingy hohajain'ny olona izy raha toa tsara laza amin'ny fananana fahitsiana mafy orina. (...) Hahazo ny fitokisan' ny rehetra ireo izay mijoro amin'ny fahamarinana ka tsy azo hozongozonina. Tsy ireo mpino namany ihany no hatoky azy fa na ireo tsy mpino koa aza dia voatery hiaiky ny maha-olo-mendrika azy. - MCP, b. 2, t. 437.
Tsy maintsy mifandray amin'izao tontolo izao ireo mpanompon' Andriamanitra noho ny fandraharahana ataony, saingy tokony hotsarovany eo am-pividianana sy eo am-pivarotana fa manara-maso azy Andriamanitra. Aoka izy tsy hampiasa mizana mandainga na ny vato samy hafa, satria fahavetavetana eo imason'i Jehôvah izany [Ohab. 20:23]. Aoka ho araka izay iriny hosainin'ny mpianakavin'ny finoana momba azy ny Kristianina eo amin'ny raharaham-barotra rehetra ataony, ary aoka ny asany rehetra hofehezin'ny fitsipika mazava. Tsy manao teti-dra-tsy izy ka tsy manan-javatra hafenina na hosarontsaronana. - MCP, b. 2, tt. 437,438.