"Farany, miraisa saina hianareo rehetra, ka miaraha ory, mifankatiava tahaka ny mpirahalahy, mifamindra fo, manetre tena, tsy mamaly ratsy ny ratsy, na fanaratsiana ny fanaratsiana; fa aoka hisaotra kosa, satria ho amin'izany no niantsoana anareo mba handova fitahiana."- 1 Pet. 3:8,9.
Mofon’aina:
Ireo izay miasa ho an'i Kristy dia tsy maintsy ho madio am-po, mahitsy, sy mendri-pitokiana, ary tsy maintsy ho malemy fanahy sy feno fangoraham-po ary mahalala fomba koa. Misy hery mahasarika eo amin'ny fifandraisana sy ny fifampiresahana amin'ireo izay tena manana fahalalam-pomba. Ny teny feno fahalemem-panahy, ny fijery feno fangorahana, ny fitondran-tena feno fahalalam-pomba dia samy tombambidy ambony tsy azo sandaina avokoa. Ny Kristianina tsy mahalala fomba, izay tsy miraharaha ny hafa, dia maneho miharihary fa tsy mikambana amin'i Kristy izy ireo. (...)
Toy ny fiainana niainan'i Kristy fony Izy tety an-tany ihany no tokony ho fiainan' ireo Kristianina mpanara-dia Azy. lzy no ohatra alaintsika tahaka, tsy amin'ny fahadiovany ihany fa amin'ny faharetany sy ny fahalemem-panahiny, ary ny fahavononany hikarakara sy hihevitra ny hafa. Hentitra sy mafy toy ny vato Izy manoloana ny fahamarinana sy ny andraikitra tokony hotontosaina, nefa kosa tsy niova ny halemem-panahy sy ny fahalalam-pomba nananany. (...)
Nitondra rivo-piainana madio sy nahafinaritra ny tokantrano ny Fanatrehany, ary ny fainany dia toy ny masirasira miasa ao anatin'ny fifangaroan'ny fiaraha-monina. Tamim-pahamendrehana tsy mety sasatra, no nandehanany niaraka tamin'ny (...) karazan'olona samihafa. Nofenoiny teny feno fangoraham-po teny amin' izay nahitany olona efa reraka sy itambesaran' ny enta-mavesatra. (...)
Nitady izay fomba hamelomana ny fanantenana tao amin'ireo izay tena ketraky ny fahakiviana sy efa nilofika tsy nanana fanantenana intsony Izy, ka napetrany teo anoloany ny antoka fa afaka ny ho tonga tsy manan-tsiny sy tsy hanana fanahiana indray izy ireo, ka hanatratra izay toetra tokony haneho ny maha-zanak'Andriamanitra azy indray. (…)
Ny fitiavan'i Kristy no manalefaka ny fo sy manalama ireo marokorokon' ny toetra rehetra. Aoka isika hianatra eo Aminy ny fomba hampiarahana ny atao hoe fahadiovana sy fahitsiana miaraka amin'ny famirapiratan'ny toetra. Ny Kristianina malemy fanahy sy mahalala fomba no fandresen-dahatra matanjaka indrindra afaka hitondra vokatra eo amin'ny fitoriana ny Filazantsara. — RH, 20 Aogositra 1959.