“(...) aoka hifikitra amin'ny heriko kosa izy ka hihavana amiko; eny, aoka hihavana amiko izy.” - Isa. 27:5b.
Tsy hain’ny fahavalo resena na ny malemy indrindra amin’ny mpianatr’i Kristy aza, dia izay mitolona amim-bavaka eo anatrehan’ny Tompo. Misalovana i Kristy ho fialofana sy fiarovana azy amin’ny fanafihan’ilay ratsy. Ity ny teny fikasana: “Fa raha avy toy ny ony ny fahavalo, ny Fanahin’i Jehovah hanangana faneva hisakanana azy.” (Isa. 59:19; jereo ny naoty etsy ambany ao amin’ny Baiboly)
Navela haka fanahy an’i Petera, ilay matoky tena loatra, i Satana, tahaka ny namelana azy haka fanahy an’i Joba koa. Saingy rehefa vitan’i Satana io asa io dia tsy maintsy miala izy. Raha navela hanao araka izay tiany i Satana dia tsy ho nisy fanantenana ny amin’i Petera, ho levona tanteraka ny finoany. Kanefa tsy sahy mandingana ny fetra napetraka mba tsy hihoarany i Satana, na kely aza. Na ny tafik’i Satana iray manontolo aza no mivondrona dia tsy afaka mandavo fanahy iray izay mitoky amim-pahatsorana amin’ny fahendren’ Andriamanitra.
Aro sy tilikambo mafy ho antsika i Kristy, ary tsy manana fahefana amin’ny fanahy izay miara-mandeha amin’ Andriamanitra amin’ny fanetren- tena i Satana. “Aoka hifikitra amin’ny heriko kosa izy ka hihavana amiko; Eny, aoka hihavana amiko izy”, hoy Jehovah. Ao amin’i Kristy no misy ny fanampiana lavorary sy tanteraka ho an’ny fanahy tsirairay alaim-panahy. Voatemitra loza ny lalana, saingy efa vonona hiaro ny lanitra manontolo mba tsy hisy na iza na iza halaim- panahy mihoatra noho izay zakany. Misy ny sasany manana toetra henjana izay mila fehezina mandrakariva. Raha ampitoerina eo ambanin’ny fifehezan’ny Fanahin’Andriamanitra izany toetra izany dia hanjary fitahiana, raha tsy izany kosa dia ho tonga ozona (...). Raha manolo-tena hanao ny asa tsy amim-pitiavan-tena isika, ka tsy mivily na amin’ny foto-kevitra kely indrindra aza, dia ho eo an- tsandrin’Andriamanitra mandrakizay, izay hanohana antsika amin-kery. Raha mino sy miantehitra tanteraka amin’i Jesésy isika, dia tsy handao antsika Izy na inon-kidona na inon-kitranga. — MLT, t. 316.