"Aza gaga noho ny nilazako taminao hoe: tsy maintsy hateraka indray hianareo." Jao. 3:7
Mofon’aina:
Ao amin'ny teny nataon'i Kristy tamin'i Nikodemosy no misy ny fahamarinana lehibe mikasika ny fiovam-po avy amin'ny Fanahy Masina: "Lazaiko aminao marina dia marina tokoa: Raha tsy ateraka indray ny olona, dia tsy mahazo mahita ny fanjakan 'Andriarnanitra. (...) Izay ateraky ny nofo dia nofo; ary izay ateraky ny Fanahy dia fanahy." - Jao. 3:3,6.— RH, 7 Jolay 1904.
Amin'ny fanavaozana ny fo no iasan' ny fahasoavan' Andriamanitra mba hanova ny fiainana. Tsy misy fiovana ivelany ampy hampifandrindra ny fiainantsika amin'Andriamanitra. Maro ireo miezaka manao fanavaozana amin'ny alalan'ny fanitsiana ny fahazaran-dratsy anankiray na ny iray hafa, ary antenainy amin'izany fa ho tonga Kristianina izy. Fanombohana diso anefa izany. Ao am-po no tokony hisian'ny fanavaozana voalohany indrindra. ( ...)
Miasa ao amin'ny mangingina sy amim-paharetana ny masirasiran'ny fahamarinana, mba hanova ny fo. Manjary malefaka sy milefitra ireo fironana maha olona. Fisainana vaovao, fihetsehampo vaovao, antony manosika vaovao no volena. Ny fiainan'i Kristy no fenitra ara-pitondrantena vaovao arahina. Miova ny fisainana, ary ampiasaina ho amin'ny tanjona vaovao ny fahaiza-manao. (...)
Ny Soratra Masina no hery lehibe ivon'io fanovan-toetra io. Hoy i Kristy raha nivavaka: "Manamasina azy amin'ny fahamarinana; ny teninao no fahamarinana." - Jao. 17:17. Rehefa halalinina sy ankatoavina ny Tenin'Andriamanitra dia miasa ao amin'ny fo, ary mandresy ny toetra tsy masina rehetra. Mandresy lahatra antsika amin'ny fampahafantarana ny fahotantsika ny Fanahy Masina, ary ny finoana izay teraka ao am-po dia miasa noho ny fitiavana an'i Kristy ka mampifandrindra ny momba antsika - ny tena sy ny fo ary ny fanahy - hifanaraka amin'ny Sitrapony.
Rehefa izay dia ho hitan'ny olona fa tandindomin-doza izy. Hitany fa ilainy ny hiova toetra sy hiova fo. (...) Miasa ao am-pony ny Fanahin'Andriamanitra, ary amin'ny tahotra sy hovitra no hiasany ka hikatsahany ny hahalala ireo kileman-toetrany sy izay azony atao mba hisian'ny fiovana ilaina eo amin'ny fiainany. (...) Hiaiky ny fahotany amin'Andriamanitra izy, ary raha toa izy nandratra ny hafa, dia hiaiky ny helony amin'izany olona izany. (...)- RH, 7 Jolay 1904.