"Ny mitoetra ao Amin'ny fierena izay an'ny Avo indrindra dia monina eo ambanin 'ny aloky ny Tsitoha." Sal. 91:1.
Mofon’aina:
Misokatra mandrakariva ny lalana mankeo amin' ny seza fiandrianan' Andriamanitra. Tsy vitanao ny mandohalika tsy an-kiato eo am-pivavahana, fa azonao atao kosa ny manandratra tsy tapaka ny fangatahanao mangina hery sy fitarihana avy amin'Andriamanitra. Rehefa alaim-panahy ianao — ary tsy maintsy ho avy izany —dia afaka mandositra ao amin'ny fierena izay an'ny Avo Indrindra ianao. Ny sandriny mandrakizay no hanohana anao. – CH, t. 362.
Fiantsoana manokana no ankanesan-tsika eo amin'Andriamanitra, ary miandry lzy handray antsika ao amin'ny efitry ny voninahiny (...). Mety ho tafiditra amin'ny fifankahazoana akaiky indrindra, sy ny firaisana amin' Andriamanitra izany isika. – S, t. 116.
Mivavaha amin'ny fo manetry tena. Tadiavo matetika amim-bavaka ny Tompo. Rehefa ao amin'ny mangingina ihany no mahita an'i Jesôsy ny maso, ary vonona hihaino Azy ny sofina. Monina eo ambanin'ny aloky ny Tsitoha ianao rehefa avy mivavaka ao amin'ny mangingina. Tonga ny fakam-panahy, fa ianao kosa mihamanakaiky an'i Jesôsy hatrany, ary mametraka ny tananao eo an-tanany. Dia hanao fanandramana sarobidy ianao, hahita fitsaharana ao amin'ny fitiavany sy hifaly noho ny famindrampony. Hanjavona ny tebiteby sy ny fisavorovoroana mbamin'ny ahiahy, ary ho sambatra ao amin'i Jesôsy Kristy ianao. Vonona hihaino ny feon'ny Ray sy hifandray amin'Andriamanitra ny fanahy. Voaisotra ao amin'ny fanahy izay rehetra mety ho fanakianana sy fitsaratsarana ny hafa. (...)
Ao amin'i Jesôsy Kristy no anomezana hanitra ny toetra. Ao Aminy no ivelaran'ny fahamen-drehan-toetra, ny fahatsarana sy ny fahadiovana, satria arakany hibanjinanao Azy nohanahafanao ny endrik'i Kristy. Ry zanakalahy sy zanakavavin'Andriamanitra, tsy maintsy mitovy Aminy isika; ary ao amin'io fifandraisana ety amin'Andriamanitra io no andraisan-tsika hery sy fitahiana avy any an-danitra mba hahafahantsika manao ny asan'Andriamanitra. (...)
Endrey ny hafaliantsika eo am-panompoana an'Andriamanitra! Endrey izany fiadanana sy fahafaham-po ary fitsaharana! Ankohonana sy zanaky ny Mpanjakan'ny lanitra isika! "Nefa tsy mbola naseho izay ho toetsika rahatrizay. Fantatsika fa raha hiseho Izy, dia ho tahaka Azy isika (...)" - 1 Jao. 3:2. Eo anatrehan'ny fanantenana sy ny fifandraisana tahaka izany, ary manoloana izany tombontsoa sarobidy rehetra izany, tsy tokony hanam-pinoana bebe kokoa ve isika? Tsy tokony ho feno fanantenana sy herim-po ve isika, ka tsy ho kivy fa haharitra tsara ao anatin'ny zava-tsarotra? – L, 110, 1893.