"Ary hitady Ahy hianareo, dia ho hitanareo Aho, raha katsahinareo amin 'ny fonareo rehetra." – Jer. 29:13.
Mofon’aina:
Maro no tsy mbola nanao ilay fanandramana ara-panahy izay tena ilainy mba hahafahany mijoro tsy manan-tsiny eo anoloan'ny seza fiandrianan'Andriamanitra. Avelan' Andriamanitra handalo ao amin'ny memin'ny fahoriana izy ireo, mba hialan'ny tain-drendrika, hanadiovany azy ireo ho afaka amin'ny loton'ny fahotana sy ny fitiavan-tena, ka ho tonga amin'ny fahalalana marina an'Andriamanitra sy ny fifankazarana amin'i Jesosy Kristy, amin'ny alalan'ny fiaraha-mandeha Aminy, tahaka ny nataon' i Enoka. (...)
Ny fivavahana marain-tsy hariva, araka ny fahazarana, dia tsy voatery hisy hafanam-po sy hahomby mandrakariva. Ho an'ny maro dia famerimberenana teny miantso torimaso, mahamonamonaina, sy tsy avy amin'ny fo izany, ka tsy mipaka any an-tsofin'Andriamanitra. Tsy ilain'Andriamanitra ny fanajantsika Azy ara-pomba fotsiny, fa ny fo torotoro, ny fiaiken-keloka, ny fanahy mangorakoraka no henoiny. (...)
Tokony ho feno fitiavana lalina an' i Jesosy isika, hany ka horaisintsika ho tombontsoa ny miari-pahoriana noho ny Aminy, eny, ny ho faty aza. Azontsika ambara amin'ny Tompo avokoa ny momba ny fitsapana rehetra atrehintsika, ny fahalementsika, ny fiankinantsika tanteraka amin'ny heriny sy ny fahefany. Izany no tena vavaka. Raha misy fotoana ilana indrindra ny Fanahin'ny fahasoavana sy ny fitalahoana hirotsaka amintsika, ka Andriamanitra mihitsy no manampy antsika amin'ny vavaka, dia izao ankehitriny izao izany. Tokony hoentina eo amin'ny fiangonana tsirairay ny teny fikasana, ary antitranterina ny fahatsoran'ny fahamarinana. "Mangataha, dia hahazo hianareo" – Jao. 16:24. Izany no finoana, ilay finoana velona ilaintsika. (...)
Hitondra sy hitarika ny vahoakany ny Tompo. Ho tonga avy amin'Andriamanitra ny baiko, tahaka ny tamin'i Daniela, mba hanampy ireo izay mitalaho amin-kafanam-po eo anoloan'ny seza fiandrianan'ny fahasoavany amin'ny andro mahory.
Mila manokatra ny fontsika ho an'i Kristy isika. Mila finoana matanjaka kokoa sy fanoloran-tena lalina kokoa isika. (...) Raha hitady ny Tompo amin'ny fontsika rehetra isika, dia hahita Azy, ary hamirapiratra ao am-pontsika ny fitiavany. Tonga tsinontsinona ny "izaho", ary Jesosy no manjary zava-drehetra ao amin'ny zavatra rehetra ho an'ny fanahy. – TFC, b. 6, t. 51.