"Izaho dia Izaho no mamono ny fahadisoanao noho ny amin 'ny tenako, ary tsy hotsarovako ny fahotanao. Ampahatsiarovy Aho, ka avia isika hifandahatra; alaharo ary ny teninao, mba hahitana izay mahamarina anao. - Isa. 43:25,26
Mofon’aina:
Hanatona anao i Satana ka hilaza fa mpanota ianao. Nefa aza avela hameno ny sainao amin'ny fisainana izy fa noho ny maha mpanota anao dia nafoin'Andriamanitra ianao. Lazao izy hoe: "eny, mpanota aho, ary noho izany indrindra no ilako Mpamonjy. Mila famelan-keloka aho, ary efa nilaza i Kristy fa tsy ho very aho raha manatona Azy. (...) Hinoako ny teny napetrany ho ahy. (...)
" Amin'ny fotoana handraisanao ny teny fikasan'Andriamanitra amim-pinoana ka hilazanao hoe: izaho ilay ondry very ary tonga mba hamonjy ahy i Jesosy, no hahazoanao fiainam-baovao ka hahazo hery hoenti-manohitra ilay mpaka fanahy ianao. Tsy amin'ny alalan'ny fihetseham-po anefa no ahazoana ny finoana hifikirana amin'ny teny fikasana. "Ny finoana dia avy amin'ny tari-teny, ary ny tori-teny kosa avy amin 'ny tenin 'i Kristy." - Rôm. 10:17. Tsy natao hiandry fiovana lehibe hiseho ianao, na hiandrandra fahatsapana fihetseham-po miavaka. (…)
Inoy ny Tenin'Andriamanitra ka lazao hoe: Tia ahy Izy, natolony ho ahy ny Ainy, ary hamonjy ahy Izy. (...) I Jesosy nojereo fa aza ny tenanao. Raiso ho Mpamonjinao Izy. Aza mitaraina noho ny fahalemenao. Raha mijery an'i Jesosy ilay Tompo sy Mpanefa ny finoanao ianao, dia ho feno fanantenana sy hahita ny famonjen'i Jehovah. Rehefa alaim-panahy hitoloko ianao, dia tereo ny molotrao hanonona fiderana an'i Jehovah. "Mifalia mandrakariva amin 'ny Tompo" - Fil. 4:4. Moa ve tsy mendrika ny hoderaina Izy? (...)
Milaza aminao ny Tompo anio hoe: aza kivy, fa apetraho Amiko ny enta-mavesatrao. Tsy hainao ny mitondra ny fahotanao, fa Izaho no hitondra azy rehetra. (...) Raha matoky Ahy ianao, dia tsy ho orin-java-tsoa na inona na inona. (...)
Tsy mbola nisy fanahy matoky an'i Jesosy ka navela ho very. Fa hoy ny Tompo: "Izaho dia Izaho no mamono ny fahadisoanao noho ny amin 'ny tenako, ary tsy hotsarovako ny fahotanao." - Isa. 43:25.- L 98b, 1896.