"Mankanesa aty Amiko"

 "Mankanesa aty Amiko, hianareo rehetra izay miasa fatratra sy mavesatra entana, fa Izaho no hanome anareo fisaharana." - Mat. 11:28.
Mofon’aina :
Maro amin'ireo izay mandre io fanasana io no maniry fitsaharana tokoa kanefa mizotra amin'ny lalana mikitoantoana, sady mamihina eo an-tratrany ny enta-mavesany. Tia azy ireo i Jesôsy ary maniry fatratra ny hitondra azy ireo sy ny enta-mavesany eo an-tsandriny mahery. Ho azony esorina ny tahony sy ny ahiahiny izay mandroaka ny fiadanana sy ny fitsaharana; kanefa mila manatona Azy aloha izy ireo, ary mamboraka Aminy ny zava-mampahory miafina ao am-pony ao. (...)
Indraindray tantaraintsika eo an-tsofin'olombelona ny olantsika, ary olona tsy afaka hanampy antsika akory no ilazantsika ny fahoriantsika. Ataontsika tsirambina ny fanankinana ny zava-drehetra amin'i Jesôsy kanefa Izy no mahay manova ny lalam-pijaliantsika ho lalana feno fifaliana sy fiadanana. (...)
Maniry ny ho namantsika Izy, hiara-mamakivaky ny lalana mikitoantoan'ny fiainana amintsika. Hoy Izy amintsika: Izaho no Jehôvah Andriamanitrao; miaraha Amiko fa hofenoiko fahazavana ny lalanao. Maniry ny homba ireo izay manatona Azy miaraka amin'ny enta-mavesany sy ny fahalemeny ary ny ahiahiny i Jesôsy, ilay Mpanjakan'ny lanitra. (...)
Manasa antsika ho amin'ny fiainana madio sy masina ary sambatra Izy   fiainam-piadanana sy fitsaharana, fiainam-pahafahana sy fitiavana — mba handova ilay fiainana ho avy tsy misy fahafatesana (...) Tombontsoantsika ny miara-mandeha amin'i Jesôsy isan'andro ao anatin'ny fahatoniana sy ny fahasambarana.
Mahita fitsaharana isika rehefa tsy manamarin-tena sy miala amin'ny fieritreretana feno fitiavan-tena. Ny fanoloran-tena tanteraka sy ny fanekena ny lalana itondran'Andriamanitra no tsiambaratelon'ny fitsaharana tanteraka ao amin'ny fitiavany (...). Ataovy fotsiny izay asainy ataonao, ka matokia fa hotanterahiny tokoa izay efa nolazainy fa hataony. (...) Moa ve efa nanatona Azy ianao, ka nilaozanao ny fisainanao feno tsy finoana sy fanamarinan-tena, ary tsy nisy nanafenanao? Manatona amin'izao toetranao izao, malemy, tsy afa-manoatra ary efa ho faty.
Inona no ampanantenaina ireo "sisa"?
— Ny fahatsapana tsara fa marina Andriamanitra, tsy mandiso fanantenana na oviana na oviana izay manatona Azy Izy. Mamela heloka tanteraka sy maimaimpoana Izy ary midika ho fitsaharana ho an'ny fanahintsika, fitsaharana ao amin'ny fitiavany, ny fanekeny antsika. - OHC, t. 97.