"Miverena ho amin'ny fiarovana mafy, hianareo mpifatotra manana ny fanantenana! Anio no hanambarako hoe: Hanonitra roa heny ho anao Aho." - Zak. 9:12.
Mofon’aina :
Ilaintsika ny mitaiza ny fanahintsika hifikitra mafy amin'ireo teny fikasan'i Kristy. Fantatr'i Jesôsy Tompo fa tsy vitantsika ny hanohitra ny fakam-panahy maro alefan'i Satana raha tsy manana ny hery avy amin'Andriamanitra isika. Fantany tsara fa raha ny herin'ny tenantsika ihany dia azo antoka fa ho resy isika. Koa nomeny avokoa izay rehetra ilaintsika, ka isaky ny misy fahamehana sy fitsapana dia hahita fiarovana mafy isika. (...) Manana ny teny fikasana avy amin'ilay molotra tsy mba mandainga isika. (...) Tsy maintsy mikolokolo ny finoana isika tsirairay fa ho azontsika tokoa izay efa nampanantenainy antsika.
Ho tonga zavatra rehetra ho antsika Andriamanitra raha avelantsika. Tsy ahazoantsika tombontsoa avy any an-danitra velively ny vavaka tsy misy aina sy tsy tena amin'ny fo ataontsika. Tena ilaintsika ny fikirizana rehefa mangataka isika! Mangataha amim-pinoana, miandrasa amim-pinoana, mandraisa amim-pinoana, mifalia amin'ny fanantenana, fa izay rehetra mitady no hahita. Aoka hafana fo amin' izany isika. Katsaho amin'ny fo rehetra Andriamanitra. Manao ny ezaka rehetra amin'ny fony sy ny sainy ny olona mba hahazoany fahombiazana ara-nofo eto amin'ity fiainana ity. Ianaro tsara amim-pahamatorana koa ny mikatsaka ireo harem-pitahiana nampanantenain'Andriamanitra, ka miezaha amim-paharetana sy fahavononana, diaho azonao ny fahazavany sy ny fahamarinanay ary ny harem-pahasoavany.
Mitalahoa fatratra amin'Andriamanitra, amin'ny fo mahitsy sy fanahy mangetaheta. Mitoloma amin'ny anjely avy any an-danitra mandra-pahazoanao ny fandresena. Apetraho eo an-tanan'ny Tompo ny momba anao rehetra, ny fanahinao sy ny tenanao ary ny sainao, ka meteza ho mpanompony be fitiavana sy feno fanoloran-tena, tarihin'ny sitrapony, fehezin'ny sainy ary heniky ny Fanahiny.
Ambarao amin'i Jesôsy izay ilain'ny fanahinao marina. Tsy ny hifandahatra maharitra na hitoriteny amin'Andriamanitra tsy akory no takina aminao, fa ny hilazanao amin'ny fo malahelo noho ny ota manao hoe: "Vonjeo aho Tompo ô, sao very". Misy fanantenana ho an'ny fanahy toy izany. Hikatsaka izy, hangataka, handondona, ary dia hahita. Ho fantatrao ny fitahian'ny fiadanan'i Kristy rehefa esorin'i Jesôsy tsy hanorotoro ny fanahinao ny entam-pahotana mavesatra. — OHC, t. 131.